Pơma pơtôch hop akŏm, Tổng Bí thư Tô Lâm tơchĕng ‘lơ̆ng Anih pơgơ̆r Trung ương, dôm anih jang kơpal, anih jang đei ƀơm truh hlôi adrin tôch ai vă jang đang tơdrong jang tôch tih, tôch đei yoa hăm trong jang ‘nao, pran kơtang, trŏ trong păng ‘moi kiơ̆ dôm tơdrong jang đei mưh bơ̆ jang Tơdrong tơchơ̆t 18. Hơiă hlŏh jĭ dôm anih jang kơpal, anih jang kơ đảng Trung ương, Khul kơdră teh đak, Quốc hội păng dôm khul jang chinh trĭ – tơpôl tơ̆ Trung ương hơnơ̆ng năm hơdrol tơƀôh trong chong glung, jang đang hơnăp jang hơmet ming dôm anih jang tơ̆ lăm, jang kĕh rim tơdrong hơgăt.

Tổng Bí thư Tô Lâm athei tơ̆ hơnăp kơnh hơnơ̆ng năng tơdrong hơmet ming, kăt tơjur bơngai jang ưh lăp 1 ‘măng đĕch, dôm tơdrong iŏk đei khei ‘năr âu ki tôch gĭt kăl mă lei ‘nao lăp hơyak blŭng đĕch, athei hơnơ̆ng tơchĕng hơlen, hơmet pơ ‘lơ̆ng vă khul bơngai jang gơ̆h sơđơ̆ng ‘lơ̆ng, bơ̆ jang đei yoa, pran ‘lơ̆ng.