Iŏk tơmam têt đei 500 rơbâu jên măt đơ̆ng Pơyan Puih mak ‘mêm mơnat yoa Jơnŭm ‘long pơglang ƀrê dêh char Đắk Lắk jang hơdoi hăm dôm anih jang, khul grŭp vang pơgơ̆r, tă H’Wênh Byă, tơ̆ plei Kroa B, xăh Cuôr Dăng, apŭng Cư Mgar tôch hơiă: “Inh vă iŏk jên âu răt phe, hơiă dêh, yoa 1 năr chă dônh kơchai tôch lap mă lei ưh đei dôm yơ. Dang ei đei tơgŭm thoi âu hơiă dêh, đei bơ̆n jên, tơmam xa inh čhôk ‘nă dêh”.

Vă tơtom tơgŭm, pơlung bơngai tơnuh, unh hnam đei tơdrong arih xa pơmat tat gơ̆h sơng xa têt đei tôm tơmam ƀiơ̆, Jơnŭm ‘long pơglang ƀrê dêh char Đắk Lắk jang hơdoi hăm dôm anih tơgŭm răt hơpăh kơhrĕng tơpu tơmam ăn dôm tơring pơmat tat, tơring kon kông. Kŭm hăm hơmet têt, Jơnŭm oei jang hơdoi tơlĕch lơ tơdrong jang vei sơđơ̆ng tơdrong arih xa tơpôl nhen: roi tơƀôh jơhngâm pran, tơdrong jĭ lơ̆m ƀơ̆r, sơnĕnh, hơpăh ƀao hiêm pơgang, pơjao jên hŏk ƀŏk păng hơpăh gre tang vang ăn đe hŏk tro pơmat tat hŏk rơgei…

Atŭm hăm ‘nŏh, dôm khul druh dăm, khul drŏ kăn, Khul vei lăng bơngai jang… kŭm pơgơ̆r lơ tơdrong vă hơmet têt ăn kon pơlei tơ̆ tơring pơmat tat, tơring sơlam teh đak. Yă Võ Thị Ngọc, Phŏ Kơdră vei lăng Khul drŏ kăn dêh char Đắk Lắk tơroi: "Hăm Khul drŏ kăn dêh char kŭm pơgơ̆r hơpăh tơmam ăn dôm bơngai pơmat tat đei kơjă 500 triu hlak jên, pơgơ̆r Têt ‘mêm mơnat tơ̆ apŭng Krông Buk; Yak hơdoi hăm drŏ kăn tơ̆ tơring sơlam, pơgơ̆r lơ tơdrong hue lăng truh tơ̆ đe dro kăn păng đe hơioh tơnuh tơ̆ tơring sơlam lơ̆m xăh Ia Lốp păng Ea Bung. Tơ̆ hơnăp kơnh vă hơnơ̆ng pơgơ̆r lơ tơdrong jang dơ̆ng tơ̆ tơring tơrang păng pơlei pơla pơmat tat".

Truh dang ei, tơ̆ dêh char Đắk Lắk đĭ đei hlŏh 55.200 unh hnam đei hơpăh tơmam têt hăm kơsô̆ jên hlŏh 25 ti. Kiơ̆ yă Nông Thị Thu, Phŏ Kơdră Anih Mặt trận Tổ quốc việt Nam dêh char Đắk Lắk, dêh char adrin pơm ‘lơ̆ng vă đĭ đăng unh hnam tơnuh, vă jê̆ tơnuh đei hơpăh tơmam, đei tơdrong ‘lơ̆ng vă ngôi pơchơt Têt kiơ̆ trong jang “ưh đei hŭt hơchăng bu tơ̆ rŏng”: "Răt hơpăh 1.550 tơpu tơmam, 1 tơpu tơmam đei 500.000 jên măt, iŏk đơ̆ng Anih mong jên yoa bơngai tơnuh kơ dêh char. Atŭm hăm ‘nŏh, jang hơdoi kơjăp hăm dôm khul grŭp lơ̆m Anih Mặt trận, bơ̆ jang lơ tơdrong jang hơmet têt ăn bơngai tơnuh kiơ̆ hơnăp jang kơdih kŭm nhen jang hơdoi hăm anih Mặt trận păng khul grŭp tơ̆ tơring pơgơ̆r lơ tơdrong ƀât Tết Nguyên đán Ất Tỵ sơnăm 2025".

Dôm năr ‘nâu, Tơdrong pơgơ̆r “Têt hơdai – Pơyan Puih mak bơnê kơ Đảng” păng “Kơchơ Têt công đoàn sơnăm 2025” tơ̆ dêh char Đắk Lắk kŭm đei pơgơ̆r hăm lơ tơdrong tôch hơiă pơm pơ čhơp jơhngâm đon bơngai jang. Tơ̆ âu, Anih pơgơ̆r hơpăh 400 tơpu tơmam ăn đe đoàn viên, bơngai jang, đei kơjă 800.000 hlak 1 tơpu; tơgŭm jên man 11 tŏ hnam “Hnam tơnŏ công đoàn" hăm kơsô̆ jên truh 550 triu.

Đei iŏk hnam đơ̆ng công đoàn man tơgŭm ‘măng mă âu, mŏ HBen Mlô, kơ pơtho tơ̆ Hnam trưng mẫu giáo Ea Hding, apŭng Cư Mgar tơroi: “Năr ‘nâu inh tôch hơiă đei dôm anih jang tơgŭm ăn inh vă man hnam công đoàn sơnăm 2025. Inh tơchĕng vă man ƀât blŭng khei 3 âu kơnh. Tơpă ‘nei, inh hơiă, čhôk ‘nă dêh.”

Tơdrong pơgơ̆r “Kơchơ Têt công đoàn sơnăm 2025” tơ̆ Đắk Lắk pơgơ̆r hăm tơdrong vang akŏm đơ̆ng 50 anih jang xa, tech mơdro. Hăm kơsô̆ tơmam yoa kăl đei kơjă vă jê̆ 1 ti hlak jên, tơ̆ aua đei pơgơ̆r lơ tơdrong tôch hơiă nhen hơpăh kơphĭu răt tơmam ưh huach jên, khăm jơhngâm pran, roi tơƀôh luơ̆t păng dôm tơdrong ngôi pơchơt ăn đe đoàn viên, bơngai jang. ‘Nao răt đei dôm tơmam mă kơdih kâu tôch lăp ƀât Tết, mŏ Tống Thị Thu Thoi, tơ̆ công ty in Đắk Lắk ăn tơbăt: “Đĭ đăng mŏ oh năm kơchơt Têt công đoàn sơnăm 2025, truh tơ̆ âu ƀôh đei lơ tơmam. Truh tơ̆ âu đei tơgŭm ăn hai, công đoàn hlôi tơlĕch lơ phĭu vă răt tơmam, tơplih tơmam. Pơma atŭm đei lơ tơdrong tơgŭm tơpă, lơ tơmam hơpăh ăn công nhân bơngai jang vang truh tơ̆ âu.”

Đei băt, ƀât Tết Nguyên đán Ất Tỵ sơnăm ‘nâu, dêh char Đắk Lắk tơlĕch hlŏh 75 ti hlak jên vă năm ngôi, hơpăh tơmam ăn dôm bơngai đei kŏng păng bơngai jang kăl đei tơgŭm. Kŭm hăm ‘nŏh, 138 anih jang, kơđông khul linh, công an, anih jang bri ‘long gô iŏk đei tơmam tơgŭm đei kơjă đơ̆ng 3-7 triu hlak jên. Kơdră chĕp kơ̆l dêh char oei vă năm ngôi păng hơpăh 54 tơpu tơmam ăn bơngai đei kŏng rơgei păng dôm anih jang, khul grŭp tơ̆ dêh char./.