Lơ̆m jơ năr Hop akŏm Khŭl chĕp kơ̆l pơgơ̆r Jơnŭm Nghị viện nơ̆r Phalăng (APF) păng Hop akŏm Nghị viện jang hơdai nơ̆r Phalăng găh choh jang sa kơjăp, sơđơ̆ng phe sa ƀa sŏng păng tơjră hăm tŏ ‘mi kial tơplih, tơ̆ pơlei tơm Cần Thơ, Kơdră Quốc hội Trần Thanh Mẫn hlôi sơng Kơdră Quốc hội Cộng hòa Dân chủ Congo Vital Kamerhe. Tơ̆ jơ sơng, Kơdră Quốc hội pơma hơdăh, Việt Nam lăng kăl tơdrong pơvei tơbôl joăt joe hăm Cộng hòa Dân chủ Congo, 2 teh đak hlôi pơjing tơdrong pơvei tơbôl đơ̆ng hơdrol ƀơ̆t iŏk đei rơngei hiôk hian (‘năr 13/4/1961); lăng ‘lơ̆ng dôm jơnei hơtŏk tơiung mŭk drăm, sơđơ̆ng chĭnh trĭ đơ̆ng Cộng hòa Dân chủ Congo khei ‘năr âu ki, tơgop hơtŏk ‘lơ̆ng anih dơ̆ng kơ teh đak tơ̆ tơring.

Tơroi rơđăh, jang hơdai nghị viện jĭ 1 tơdrong jang gĭt kăl lơ̆m tơdrong pơvei ‘lơ̆ng hơiă đơ̆ng 2 teh đak lơ̆m pơđĭ trong jang 2 pang păng lơ pang, Kơdră Quốc hội Trần Thanh Mẫn ‘meh vă, tơ̆ hơnăp kơnh pơtrŭt pơvei nghị viện 2 teh đak, lơ̆m noh 2 păh akŏm pơma dơnuh khŭl kơdră kơpal đơ̆ng kơdră chĕp kơ̆l Nghị viện 2 teh đak, kŭm nhen dôm anih joăt jang kơ 2 Quốc hội.