‘Măng năm bơ̆ jang đơ̆ng Thủ tướng Phạm Minh Chính iŏk đei lơ tơdrong ‘lơ̆ng tôch gĭt kăl, hơnhăk tơdrong pơvei jang tơbôl đơ̆ng Việt Nam hăm Ba Lan, Séc păng Thụy Sĩ mât lơ̆m chăl jang tŏk ‘nao, pơm hơtŏk tơdrong pơvei, hơtŏk đon lui găh chinh trĭ. Thủ tướng Phạm Minh Chính đei hlŏh 30 ‘măng pơma đam, tơƀâp pơma nuh, iung pơma găh trong jang, vang truh hop akŏm hăm anih tĕch mơdro, truh akŏm hăm “Pơyan Puih mak pơlei pơla”, năm ngôi tơ̆ 1,2 anih joh ayŏ kơ dŏ xoang, khoa hŏk - ki thuơ̆t tơ̆ dôm teh đak.

Lơ̆m hlŏh 30 jơ tơ̆ Davos, Thủ tướng Phạm Minh Chính đei jơnăr bơ̆ jang tôch lơ hăm lơ tơdrong jang lơ pang păng 2 pang. Thủ tướng teh đak, kơdră chĕp kơl dôm anih tơm, anih jang kơpal păng tơring tơrang vang pơma nuh hăm lơ grŭp jang tih tơ̆ 5 ‘măng pơma đam găh lơ tơdrong gĭt kăl, đơ̆ng kơmăy kơmŏk ‘nao, kơmăy rơgei truh pơgang, anih jang trong nơnăm, unh hơyuh rơgŏh păng anih jang jên hu.