Đơ̆ng rŏng 3 sơnăm bơ̆jang kiơ̆ tơdrong jang hơdai tơroi tơbăt, Anih radiô nơ̆r pơma Việt Nam hlôi pơgơ̆r chih hloh 3.000 tơdrong kơtơ̆ng, ƀai, apĭnh jet, pơih pơre nơ̆r kơtă găh dôm tơdrong jang mŭk drăm, joh ayŏ, tơpôl, sơđơ̆ng - khŭl linh lơ̆m dêh char Dak Lak. Hơdai hăm hlôi chih tơlĕch păng pơih pơre 1.816 tơdrong tơroi nơ̆r kon kon kông, ‘noh đei: 908 tơdrong tơroi nơ̆r Êđê păng 908 tơdrong tơroi nơ̆r M’Nông, jĭ 2 nơ̆r pơma kon kông kơtă anih tơ̆ Dak Lak.

Pơma tơ̆ hop akŏm, Bơngai jang lơ̆m Trung ương Đảng, Kơdră dơnơm vei lăng Anih radiô nơ̆r pơma Việt Nam Đỗ Tiến Sỹ pơma hơdăh, Radiô nơ̆r pơma Việt Nam hlôi păng gô ling lang vang yak hơdai hăm dêh char Dak Lak lơ̆m tŭn pran hloh dơ̆ng tơdrong kơtơ̆ng ang, tơroi tơbăt. Lơ̆m noh lăng kăl jang kiơ̆ dôm trong jang đei tơgŭm hơdrô̆ ăn tơring Tây Nguyên păng Dak Lak. Bí thư Anih jang Đảng dêh char Dak Lak kŭm athei, tơ̆ hơnăp kơnh, Anih Radiô nơ̆r pơma Việt Nam hơnơ̆ng pơih să dơ̆ng dôm tơdrong jang hơdai kơtơ̆ng ang, tơroi tơbăt.