Pơgê brei (11/6), Anih jang Đảng Kŏng an Trung ương jang hơdai hăm Anih jang Trung ương Đảng păng Anih pơgơ̆r jang Trung ương pơgơ̆r lêh roi tơbăt hơdăh Tơdrong tơchơ̆t đơ̆ng Anih tơm Chĭnh trĭ athei ƀok Thượng tướng Lương Tam Quang, Bơngai jang lơ̆m Trung ương Đảng, Kơdră Anih tơm vei lăng Kŏng an pơm Bí thư anih jang Đảng Kŏng an Trung ương, jăl jang 2020 - 2025. Pơma iŏk hơnăp jang, Kơdră tơm Lương Tam Quang bơnê tơdrong chih iŏk, lui ngeh, pơjao hơnăp jang đơ̆ng Đảng, kơtă ‘noh jĭ Anih tơm Chĭnh trĭ, Ban Bí thư, ƀok Tổng Bí thư Nguyễn Phú Trọng hăm kơ dih sư.

Kơdră tơm Lương Tam Quang pơkă kiơ̆ lơ̆m kơchư̆k jang ‘nao gô 1 jơhngơ̆m đon, drơ̆ng1 nơ̆r, kŭm hăm tơpôl Anih jang Đảng Kŏng an Trung ương hơnơ̆ng jang pơtăl, hơtŏk tơdrong joăt ang hơdăh, jang kiơ̆ tơpăt, đei yua kơchư̆k jang, hơnăp jang đei pơjao. Pơvei jang kiơ̆ Tơdrong jang chĭnh trĭ, Tơdrong hơgăt đơ̆ng Đảng, dôm tơdrong kăl đơ̆ng Đảng, mă loi ‘noh tơdrong kăl akŏm kon pơlei pơm tơm; hơtŏk ‘lơ̆ng hơnăp jang pơm jŭk yŭk trong hơkâu, hơtŏk jơhngơ̆m đon pơ̆n tơchĕng, pơ̆n jang, pơ̆n pŭ hơnăp jang; đĭ jơhngơ̆m yua kơ tơdrong jang atŭm.