‘Nâu jing jăl trong tơm kăp gĭt, tơroh tơring Tây Nguyên hăm tơring Hlĕch Pơbah, tơring Pơmơ̆t Pơbah păng pơlei tơm HCM hơtaih pơhlom 128,8 km, hăm kơsô̆ jên asong pơhlom 25.540 tih hlj. Gah tơchơ̆t asong man, Ƀô̆ trương Anih tơm Trong nơnăm păng Pơdŭ tơmam drăm Nguyễn Văn Thắng ăn tơbăt, tơdrong ming man tơgŭm pơjing đei trong tơm tih tơroh tơring Tây Nguyên hăm tơring Hơlĕch Pơbah, tơroh pơlei tơm HCM hăm dôm dêh char Bình Phước, Đăk Nông, Đăk Lăk, Gia Lai păng dôm tơring nai lơ̆m tơring, pơjing cham char hơtŏk tơ-iung ‘nao.

Atŭm hăm noh, iŏk yua teh hlôi đei vă hơtŏk jang tơmang pơhiơ̆, pơm tơlĕch tơmam drăm păng jang kŏng ngĭp sir tơmo gĭt... dar deh đei hơmet hơtŏk mŭk drăm tơring Tây Nguyên; tơgop pơm jang đei jơnei dôm tơchơ̆t, sơnong jang hơtŏk mŭk drăm tơpôl, vei sơđơ̆ng tơpôl tơring Tây Nguyên, tơring Hlĕch Pơbah păng kơ teh đak kiơ̆ Tơchơ̆t Hop akŏm bơngai tang măt jơ̆p teh đak ‘măng mă 13 kơ Đảng, dôm Tơchơ̆t đơ̆ng Anih tơm Chĭnnh trĭ hlôi hơlen.