Hop akŏm sơkơ̆t hơdăh, khŭl lĭnh kŏng an ling lang hơtŏk ‘lơ̆ng jơhngơ̆m đon jang tơnăp “yua kơ kon pơlei pơvih pơvăn”, hlôi đei lơ tơgop lơ̆m kơplăh hơmet pơ ‘lơ̆ng hiong răm đơ̆ng ‘mi kial đak tih, tơgŭm kon pơlei hăm tơdrong jang tơm “dŏng bơngai ‘noh kăl hloh đơ̆ng khŭl lĭnh kŏng an kon pơlei”.

‘Mi kial hơbŭt kơsô̆ 3 păng ‘mi đak tih đơ̆ng rŏng kơ kial hơbŭt hlôi pơm ăn hiong răm tôch kơ tih găh bơngai păng mŭk tơmam hăm kon pơlei dôm dêh char tơring găh Tu, mă loi ‘noh jĭ tơ̆ dôm tơring Lào Cai, Yên Bái, Cao Bằng, Hà Giang... pơm ăn hiong răm tih, hăm hloh 348 ‘nu lôch, hiong dong; vă jê̆ 2 rơbâu ‘nu rơka; hloh 230 rơbâu tŏ hnam hư răm; hiong răm dang 32 rơbâu ti hlak jên. Hơtŏk jơhngơ̆m đon ‘mêm băl, kŏng an dôm anih jang, tơring hlôi kơchăng lơ̆m tơdrong jang tơchă, dŏng tơgŭm, dŏng sar bar, vang tơgŭm kon pơlei hơmet pơ ‘lơ̆ng hiong răm đơ̆ng kial hơbŭt kơsô̆ 3 păng ‘mi tih đơ̆ng rŏng kial hơbŭt, vei sơđơ̆ng tơdrong jang hơrih sa, sơđơ̆ng kon pơlei, sơđơ̆ng tơdrong.