Kiơ̆ ƀok Phạm Đăng Khoa, Kơdră vei lăng pơtho pơhrăm dêh char Đắk Lắk, đơ̆ng rŏng 10 sơnăm bơ̆jang, trong set điêm mât hŏk lơ̆m 10 đei ƀôh lơ tơdrong ưh kơlăp hăm tơring. Kơsô̆ hŏk tro tŏk kiơ̆ sơnăm, pơm ăn tơmam drăm, lăm hŏk păng khul thây kô ưh đei druh kiơ̆ tom.

Kŭm hăm ‘nŏh, bơ̆ jang tơdrong jang tơm đơ̆ng Khul kơdră tĕh đak găh “Pơtho pơhrăm kiơ̆ tơdrong jang păng tơƀôh trong ăn hŏk tro hŏk pơhrăm đơ̆ng 2018 – 2025” gô đei dang 70% hŏk tro tốt nghiệp lăm 9 tŏk hŏk dơ̆ng jăl THPT, oei dang 30% hŏk tro ‘nŏh chă hŏk tơ̆ dôm anih pơtho tơdrong jang hŏk trung cấp, sơ cấp.

Mă lei tơ̆ Đắk Lắk, dang ei kơsô̆ âu oei lơ (dang 90% hŏk tro tốt nghiệp lăm 9 tŏk hŏk tơ̆ jăl THPT). Yoa thoi nŏh, dêh char athei tơchĕng truh trong pơgơ̆r thi mât hŏk lăm 10 tơ̆ dôm hnam trưng tĕh đak pơjing, tơplih ăn tơdrong set điêm lơ̆m hŏk ƀă nhen hrei ‘nâu.