Ƀơm truh tơdrong gre tơ̆m preh băl kơtang tơ̆ apŭng Chư Pứh, dêh char Gia Lai pơm ăn 3 ‘nu bơngai jang lơ̆m Kâu lak ƀô̆ đă ƀŏng lŏng HAGL lôch, ‘năr 13/8, ƀok Khuất Việt Hùng- Phŏ Kơdră joăt jang Anih vei lăng sơđơ̆ng trong nơnăm teh đak hlôi đei jơ bơ̆jang hăm Anih vei lăng kon pơlei apŭng Chư Pưh găh tơdrong vei lăng sơđơ̆ng trong nơnăm tơ̆ trong gre 14 klĕch tơring păng apĭnh jet gia ŭnh hnam dôm bơngai răm. Kiơ̆ tơroi tơbăt, đơ̆ng blŭng sơnăm truh dang ei, tơ̆ apŭng đei 13 ‘măng gre tơ̆m preh băl, pơm ăn 10 ‘nu lôch, 4 ‘nu rơka. Kăl kơ lăng truh găh lơ dôm ‘măng gre tơm preh băl đei ƀôh tơ̆ 31 km trong gre 14 năm klĕch apŭng.

Pơma tơ̆ jơ bơ̆jang, ƀok Khuất Việt Hùng athei Anih vei lăng kon pơlei apŭng Chư Pứh hơvơn tôch rim khŭl linh hơmet pơ ‘lơ̆ng hiong răm ‘măng gre tơ̆m preh băl âu ki, jăh dăr hơlen; khŭl linh kơpal dêh char Gia Lai sek phak, hơmet pơ ‘lơ̆ng pơtôch dôm bơngai pơm glăi. Tơring kăl kơ tơlĕch jang hrôih tơdrong chô̆ camera dăr hơlen trong nơnăm. Anih vei lăng sơđơ̆ng trong nơnăm ‘meh vă dêh char Gia Lai đei dôm trong jang đunh đai găh proh hơmet kon pơlei oei tơ ter 2 păh trong gre 14 vă vei sơđơ̆ng trong sơnăm.