Vă jang kiơ̆ tơdrong jang tơmơ̆t hơdai kơchư̆k pơm Bí thư Chi bộ jang hloi kơdră pơgơ̆r pơlei, lơ̆m dôm sơnăm âu ki, apŭng Sa Thầy, dêh char Kon Tum hlôi bơ̆jang kiơ̆ ‘lơ̆ng tơdrong jang rơih iŏk bơngai jang vei sơđơ̆ng găh hlôh vao, gơh jang, đei đon ‘lơ̆ng păng bưng ai.

Lơ̆m 64 pơlei găh 11 xăh, thị trấn kơ apŭng dang ei đei 53 Bí thư Chi bộ pơm hloi kơdră pơgơ̆r pơlei păng 11 Bí thư Chi bộ pơm hloi kơdră Khŭl jang tơdrong jang Mặt trận pơlei. Bơ̆jang kiơ̆ tơdrong jang tơmơ̆t hơdai kơchư̆k pơm Bí thư Chi bộ jang hloi kơdră pơgơ̆r pơlei, truh dang ei dêh char Kon Tum hlôi đei 360 lơ̆m akŏp kơ sô̆ 756 pơlei, kueng kơ phô̆ đei Bí thư Chi bộ pơm hloi kơdră pơgơ̆r pơlei, kơdră pơgơ̆r kueng kơ phô̆. Ƀơ̆t măt vă lăp hăm tơdrong yan âu, lơ tơring lơ̆m dêh char tŏk bŏk jang kiơ̆ tơdrong tơmơ̆t hơdai kơ chư̆k pơm Bí thư Chi bộ jang hloi kơdră pơgơ̆r pơlei păng Bí thư Chi bộ jang hloi Kơdră Khŭl jang tơdrong jang Mặt trận pơlei.