Pơgê ‘năr 7/9/2023, Thủ tướng Phạm Minh Chính kŭm hăm Kơdră chĕp kơ̆l ASEAN păng dôm tĕh đak jang hơdoi hơnơ̆ng Hop akŏm tih ASEAN-Ấn Độ ‘măng mă 20 păng Hop akŏm tih Đông Á (EAS) ‘măng mă 18. Tơ̆ Hop akŏm tih ASEAN-Ấn Độ ‘măng mă 20, dôm pang năng kăl tơdrong pơvei jang hơdoi gĭt kăl tôm tơdrong đei pơjing sơnăm 2022. Thủ tướng Ấn Độ Narendra Modi pơma hơdăh, ASEAN jĭ jrăng tơm dơnơm lơ̆m trong jang Hue lăng truh tơring Hơlĕch păng jĭ tơring tơm lơ̆m tơdrong Pơchĕh Ấn Độ Dương-Thái Bình Dương đơ̆ng Ấn Độ.

ASEAN păng Ấn Độ drơ̆ng nơ̆r pơ ‘nhŏ ăn dôm tơdrong jang hơdoi kơjăp ‘lơ̆ng găh đak dơsĭ, mŭk drăm rơgŏh ‘lơ̆ng tơ̆ đak dơsĭ, tang găn khul pơm kơnê̆, pơm yoch klĕch tơ̆ tĕh đak nai, hơtơ̆k jơhngâm jang pơgang, tơguăt kơjăp, tơmât yoa khoa hŏk kơmăy kơmŏk, tơplih hăm kơmăy sô̆, atŭm hăm ‘nŏh pơih xă tơdrong jang hơdoi găh unh hơyuh, tơjră hăm tŏ ‘mi kial tơplih. Thủ tướng Ấn Độ roi tơbăt pơjing Anih mong jên ASEAN-Ấn Độ yoa jang kơmăy sô̆ ning mônh kơnh. Tơ̆ hop akŏm tih ASEAN Đông Á ‘măng mă 18 (EAS-18), dôm tĕh đak pơkăp tơgŭm ăn hơnăp jang tơm đơ̆ng ASEAN, vang pơjing trong jang hiôk ‘lơ̆ng, rơđăh rơđong, tôm tĕch păng ‘moi kiơ̆ khôi luơ̆t apŭng plenh tĕh păng Tơdrong tơchơ̆t đơ̆ng Liên hợp quốc.