Năr hơtuch giĕng, đảng viên Y Bleng, hơdrung M’nông, mĭnh ‘nu ƀô̆ đô̆i so păng jĭ kră pơlei kơ ƀon 9, tơring Dak Drô, apŭng Krông Nô vang năm hơdoi hăm khul kơdră chĕp pơgơ̆r pơlei năm truh rim ŭnh hnam dơnuh lơ̆m pơlei. Đơ̆ng noh, ƀok hăm khul kơdră vei lăng pơlei chă pơtho khan, pơrô̆ pơrôp rim ŭnh hnam hơdrin jang sa, tơplih trong jang sa. Kră pơlei Y Bleng tơbăt, lơ̆m pơlei kư̆ mă 5 đảng viên, 5 ŭnh hnam đei ƀôh ‘noh vang chă tơgŭm djru mĭnh ŭnh hnam dơnuh. Đe sư lăng tông nông gia kơjăp tơgŭm djru rim ŭnh hnam hơdrin yak hloh mơmat nat, đơ̆ng tơdrong chă tơgŭm ăn hơdrĕch dơđăh, kon tơrong chă jang sa, pơtho tơbăt trong jang sa ..., truh tơdrong tĕch mơdro tơmam drăm choh jang sa hloi. Rim ŭnh hnam dơnuh đei pơtho ăn trong jang sa, chă hơlêm jơhngơ̆m đon vă hơdrin yak hloh tơnap tap. Trong tơlĕch jang kơ pơlei ‘noh đơ̆ng rŏng dang 3 sơnăm ‘noh kĕ tơgŭm ăn ŭnh hnam dơnuh yak hloh dơnuh hin kơjăp ‘lơ̆ng. Ƀok Y Bleng tơbăt:“ ‘Nhŏng oh bơ̆n chă pơtho khan dih băl, chă pơrô̆ athei kon pơlei tơgoăt tơgoăl pôm nơ̆r ƀơ̆r đon, atŏk tơ iung mŭk drăm. Bơngai ƀô̆ đô̆i so ‘noh kăl pơrô̆ pơrôp pơtho khan ăn kon pơlei, jei lăng tông nông gia kơjăp truh ŭnh hnam dơnuh. Ŭnh hnam ayơ tơnap tap ‘noh bơ̆n chă pơtho khan, ‘nhŏng oh ayơ đei ƀôh ‘noh jei vang tơgŭm djru dôm ŭnh hnam oei mơmat tat.”

Năr 23/3 au, dêh char Dak Nông pơgơ̆r tơbăt 20 sơnăm năr pơjing dơ̆ng dêh char, jei jing năr tơbăt 49 sơnăm năr rơngei Gia Nghĩa, dêh char Quảng Đức (sơ̆). Ƀôh hơdăh tơdrong tơplih ‘nao kơtang kơ pơlei pơla, kơ pơlei tơm Gia Nghĩa, đảng viên, kră pơlei Điểu Đi, kơ pơlei Bu Păng 2, ƀlŏk hơdơ̆r dơ̆ng dôm năr bơ̆ jang ba hla bơar, koa kơ đak, yak hloh bri kông, vei kơjăp tơƀơ̆p pơma dơnuh hăm khul kĕch mang oei tơ̆ kăn kư̆ tơring sơlam teh đak Quảng Trực, Tuy Đức. Ƀok tơbăt, lơ̆m chăl sơnăm tơblăh, ayăt tơdruh ƀôm, prăh ƀrơ̆m phao kơtoang tôch kơtang, mă lei kon pơlei oei ling lang vei kơjăp pơlei, mĭnh nơ̆r ƀơ̆r đon kiơ̆ Đảng, kiơ̆ kĕch mang. Teh đak rơngei keh kong, tơdrong hơrih sa kơ kon pơlei phĭ tơtŏ dơnŏ ‘lơ̆ng dơ̆ng kơjăp, tơring sơlam teh đak tơplih hơnơ̆ng kiơ̆ kơ năr, ƀok Điểu Đi sa roi lui kơjăp hloh dơ̆ng lơ̆m tơdrong chĕp pơgơ̆r đơ̆ng Đảng: “Lơ̆m chăl tơblăh vang ‘noh atŭm hăm kĕch mang iung tơjră vei lăng tơring au. Rơngei bơih ‘noh akŏm jang sa, tơ iung pơjing pơlei pơla. Hăm hơnăp jang jĭ bơngai đảng viên, bơngai đei kon pơlei lui yom ‘noh nhôn jei kăl chă pơrô̆ pơrôp, pơtho khan ăn kon pơlei atŏk kơtang jơhngơ̆m đon ‘lơ̆ng, hơdrin jang sa, pơjing đei tơdrong hơrih sa hiôk chơt păng vei lăng sơđơ̆ng dơ̆ng kơjăp tơring sơlam teh đak au”.

Hưch hanh hơmanh bơnê đei hơrih sa lơ̆m pơlei pơla Dak Nia (Pơlei tơm Gia Nghĩa), tơring đei Hơnih gru gra gĭt kăl dăr sơnăm kơ teh đak-hơnih ƀơ̆t sơnăm 1960 Đoàn B90 oei găh Tu păng Đoàn C200 oei tơ̆ Pơbăt truh tơƀơ̆p pơma dơnuh dih băl, pơjing keh đang trong glung Hồ Chí Minh gĭt kăl, ƀok K Sung, Kơ iĕng Ƀĭ thư chi bộ, Kơdră vei lăng pơlei Ting Wel Đơm, sa roi chơt hơ iă hloh dơ̆ng mưh tơdrong hơrih sa kơ pơlei roi năr roi atŏk tơ iung: “Lơ̆m sơnăm tơblăh vang hrang tơƀet sơ̆, hăm kon kông bơ̆n tơ̆ au ling lang lui kơjăp lơ̆m Đảng. Dĭng truh dang ei, kon pơlei oei lui kơjăp trong bơ̆ jang đơ̆ng Đảng, Khôi luơ̆t Teh đak, ling lang tơgoăt tơgoăl pôm nơ̆r ƀơ̆r đon vă vei kơjăp sơđơ̆ng rơngei keh kong nhen hrei au păng ling lang tơgoăt tơgoăl vă atŏk tơ iung mŭk drăm roi năr roi đei ƀôh, tơdrong hơrih sa roi năr roi atŏk tơ iung vă kon pơlei pơdrŏng, teh đak pran kơtang.”

Atŏk kơtang hơnăp jang kơ dôm đảng viên, bơngai đei kon pơlei lui yom, hloh 20 sơnăm pơjing dơ̆ng ( tơklăh đơ̆ng dêh char Dak Lăk so), dêh char Dak Nông ling lang vei kơjăp sơđơ̆ng chinh trĭ, atŏk tơ iung pran kơtang mŭk drăm-tơpôl. Sơnăm 2020, Dak Nông hlôi yak hloh kơ dêh char dơnuh, păng hrei au tŏk bŏk hơdrin đei jing dêh char đei ƀôh kơ tơring Tây Nguyên.

Tơ̆ hơnăp dôm tơdrong pơkoĕl hle, sơnăm 2013, Dơnŏ anih Đảng dêh char Dak Nông pơjing Tơdrong vă jang 05 găh tơ iung pơjing khul jang tơm dơnơm lơ̆m tơring kon kông. Truh dang ei, khul au đei vă jê̆ 500 ‘nu, đei pơtho pơhrăm hlôh vao găh trong bơ̆ jang kơ Đảng, khôi luơ̆t Teh đak, trong jang chă pơrô̆ pơrôp, pơtho khan ăn kon pơlei pơla lơ̆m chăl hle. Đơ̆ng noh, đe sư hlôi bơ̆ jang tơnăp, băt hơdăh jơhngơ̆m đon hơpơi ‘meh vă đơ̆ng kon pơlei, tơroi tơbăt tơtom dôm tơdrong au to lơ̆m tơring vă đei trong xek tơlang hơmet pơ ‘lơ̆ng keh đang. Adoi ‘moi kiơ̆ đơ̆ng tơdrong tơnăp chă pơrô̆ pơrôp kơ đe sư hlôi tơgŭm ăn kon pơlei hơtŏk kơtang jơhngơ̆m đon kơchăng, iung tơjră, tang găn kĕ tơdrong đe hơlĕnh pơdăr, pơgơ̆m tơdrong vei lăng kon kông, lui khop vă pơm tơdrong. Dôm tơdrong chă tơhil dih băl, tơgar dih băl au to đei xek tơlang keh đang đơ̆ng tơring hloi. Păng dôm bơngai au hlôi kơrŭn đĭ ai vang iung jang tơ iung pơjing rim tơdrong jang pơting dih băl ‘mêm kơ eng teh đak, rim ‘măng pơrô̆ hơvơn tơ̆ tơring nhen đĭ đăng kon pơlei tơgoăt tơgoăl pôm nơ̆r ƀơ̆r đon tơ iung pơjing tơring tơrang ‘nao, tơjur dơnuh kơjăp ‘lơ̆ng.

Ƀok Hồ Văn Mười, Kơ iĕng Kơdră chĕp pơgơ̆r Đảng dêh char, Kơdră chĕp pơgơ̆r Hơnih vei lăng kon pơlei dêh char Dak Nông sơkơ̆t hơdăh, atŏk kơtang hơnăp jang kơ đảng viên, bơngai đei kon pơlei lui yom lơ̆m tơring kon kông ‘noh jing tơdrong jang kăl hloh kơ rim hơnih bơ̆ jang, tơring tơrang vă dêh char atŏk tơ iung:“Rim hơnih đảng, kơdră chĕp pơgơ̆r tơring kơrŭn đĭ ai pơgơ̆r rim tơdrong jang vă atŏk kơtang hơnăp jang kơ bơngai đei kon pơlei lui yom, khul jang tơm dơnơm, hơnơ̆ng tơ iung pơjing, hơmet pơ ‘lơ̆ng khul dôm bơngai đei kon pơlei lui yom lơ̆m tơring kon kông; hơnơ̆ng tơ iung pơjing păng lang să rim khul jang ‘lơ̆ng, tơnăp, gơ̆h hơgei lơ̆m rim tơdrong vă tơgop atŏk tơ iung mŭk drăm-tơpôl, sơđơ̆ng dơ̆ng kơjăp tơ̆ rim tơring tơgop tơ iung pơjing pơlei pơla Dak Nông roi năr roi pơdrŏng ‘lơ̆ng liĕm.”

Hơlen trŏ ƀlep hơnăp jang kơ bơngai đei kon pơlei lui yom lơ̆m kon pơlei pơla kon kông, đei trong jang tơgŭm djru trŏ lăp vă kĕ atŏk kơtang hơnăp jang “dôm bơngai tơm dơnơm kơ pơlei pơla”, hlôi tơgop kơtang tơgŭm dêh char Dak Nông vei kơjăp sơđơ̆ng chinh trĭ, iŏk đei jơnei kơtang lơ̆m atŏk tơ iung mŭk drăm.