Lơ̆m jơ ‘năr gĭt kăl tơ̆ Hnam hop akŏm pơlei Diêo, tơring Bông Krang, apŭng Lăk, dêh char Dak Lăk tơ̆ hơnăp hla kơ Teh đak, hla kơ Đảng, rup Ƀok Hô, H Mên Teh pơpak pơma pơkăp lơ̆m Pơm lêh pôk tơmơ̆t pơm đảng viên hle.“Ling lang mĭnh nơ̆r ƀơ̆r đon kiơ̆ trong Kĕch mang kơ Đảng, pơm kiơ̆ kơjăp trong bơ̆ jang chinh trĭ, tơdrong pơkăp kơ Đảng, Tơdrong tơchơ̆t, Nơ̆r athei jang kiơ̆ đơ̆ng Đảng, khôi luơ̆t kơ Teh đak. Jang keh đang kơtang dôm tơdrong jang hlôi pơjao. Pơkăp kơjăp, pơkăp kơjăp, pơkăp kơjăp!”

H Mên Teh, rơneh sơnăm 1996, hơdrung M’Nông, đơ̆ng rŏng lơ sơnăm hơdrin đơ̆ng mă kon pơlei oei sa ‘lơ̆ng dang ei hlôi đei jing đảng viên mă 9 kơ chi ƀô̆ pơlei Diêo. H Mên Teh tơbăt:“Ba tôch hưch hanh đei jing đảng viên kơ  Đảng Cộng Sản Việt Nam. Ba gô hơdrin hloh dơ̆ng lơ̆m rim tơdrong jang kơ pơlei”.

Atŏk tơ iung đảng viên lơ̆m tơring kon kông jĭ tơdrong ưh kơ ƀônh yă kiơ ôh, mă loi hăm dôm tơring tơnap tap kơ apŭng Lăk. Mă lei hăm kơrŭn đĭ jơhngơ̆m “Tơ iung pơjing, atŏk tơ iung chi ƀô̆ pran kơtang” rim khul đảng tơring hlôi pơjing đei trong pơprŏ jang, tơlĕch Tơdrong tơchơ̆t găh atŏk tơ iung đảng viên rim sơnăm. Atŭm hăm ‘noh, rim đảng viên lơ̆m rim chi ƀô̆, kơrŭn đĭ jơhngơ̆m pơm jŭk yŭk trong hơlau, pơm ăn tơdrong long jing tơdrong rơvơn lơ̆m atŏk tơ iung muk drăm-tơpôl tơ̆ tơring. Ƀok Y Wu Sruk, Kơ iĕng kơdră chĕp pơgơ̆r Hơnih vei lăng kon pơlei tơring Yang Tao, apŭng Lăk, dêh char Dak Lăk tơbăt:“Tơdrong rơvơn ‘noh jĭ ba bơngai kon kông kơtă, mă tơring Yang Tao ‘nŏh tơring tơnap tap hloh, tơmơ̆t 95% ‘noh bơngai kon kông. Ba băt hơdăh tơdrong joăt joe oei sa tơ̆ au, mă kăl lơ̆m tơdrong hlôh vao dih băl nơ̆r pơma kơna ba chă pơma dơnuh hăm kon pơlei ƀônh ƀiơ̆. Đơ̆ng noh băt hơdăh tơdrong joăt joe oei sa kơ kon pơlei, tơdrong tơnap tap kơ kon pơlei. Đơ̆ng tơdrong hlôh vao au ba pơtho tơbăt ăn kon pơlei băt găh trong bơ̆ jang ‘lơ̆ng hơ iă đơ̆ng Đảng, Khôi luơ̆t Teh đak vă kon pơlei hlôh vao păng pơm kiơ̆ lơ̆m tơdrong hơrih sa kơ ‘năr”.

Kiơ̆ đơ̆ng yă Đào Thị Thanh An, Kơ iĕng Ƀĭ thư apŭng Lăk, dêh char Dak Lăk, đơ̆ng tơdrong yan au kơ tơring đei lơ kon kông hơrih sa, Khul kơdră chĕp pơgơ̆r Đảng apŭng Lăk sơkơ̆t hơdăh, tơdrong atŏk tơ iung đảng viên bơngai kon kông atŭm hăm pơjao tơmơ̆t jang kang ƀô̆ khul chinh trĭ tơ̆ tơring. Đơ̆ng noh, tơgop pơm hơtŏk iŏk đei jơnei lơ̆m bơ̆ jang vei lăng kon pơlei, tơ iung pơjing khul chinh trĭ pran kơtang, atŏk kơtang tơgoăt tơgoăl rim hơdrĕch hơdrung. Yă Đào Thị Thanh An tơbăt:“Lơ̆m khei năr au ki, hơnăp jang kơ kang ƀô̆ đang viên, mă kăl đảng viên kon kông hlôi jang ‘lơ̆ng hơnăp jang, tơdrong jang, mă kăl hlôi pơrô̆ pơrôp, pơtho tơbăt ăn kon pơlei lơ̆m atŏk tơ iung mŭk drăm-tơpôl, sơđơ̆ng dơ̆ng kơjăp tơring păng tơ iung pơjing khul chinh trĭ tơ̆ tơring. Pơrô̆ pơrôp, pơtho tơbăt ăn kon pơlei ‘nĕ kơ mơ̆ng, ‘nĕ kơput khul kơnê chă pơhlŭ pơdôr păng atŏk kơtang tơgoăt tơgoăl pôm nơ̆r ƀơ̆r đon lơ̆m rim hơdrĕch hơdrung”.

Truh dang ei, lơ̆m apŭng Lăk đei vă jê̆ 1.400 ‘nu đảng viên ‘noh bơngai kon kông, tơmơ̆t hloh 42% akŏp đảng viên lơ̆m apŭng. ‘Nau jĭ khul gĭt kăl hloh, tơgop kơtang lơ̆m tơ iung pơjing pơlei pơla roi năr roi atŏk tơ iung.