Koeng kơphô̆ 8, phương Tân Tiến, pơlei tơm Buôn Ma Thuột, dêh char Dak Lăk đei 62 ‘nu đảng viên. Yă Vũ Thị Huê – Bĭ thư chi ƀô̆ tơbăt: đơng sơnăm 2019 truh dang ei, mĭnh sơnăm chi ƀô̆ tơmơ̆t đơ̆ng 2-3 ‘nu đảng viên. Hơdrô̆ sơnăm 2024 hlôi pôk tơmơ̆t đei 3 ‘nu đảng viên. Rim đảng viên ‘nao jei hŏk đang đơ̆ng jăl pêng năm tơ̆ hŏk jrŭ, đei jơhngơ̆m đon ‘lơ̆ng, sơnăm oei mơlôh. 5 sơnăm hơnơ̆ng, chi ƀô̆ đei Đảng ƀô̆ phương Tân Tiến tơchơ̆t jing chi ƀô̆ jang ‘lơ̆ng hloh. Yă Vũ Thị  Huê pơma:  “Nhôn pơjao ăn 7 khul jang tơ̆ koeng kơphô̆, mĭnh khul kăl tơƀôh tơbăt ăn mĭnh ‘nu kon pơlei oei sa ‘lơ̆ng vă pôk tơmơ̆t lơ̆m Đảng. Rim đe oh đoàn viên hơdrin hŏk pơhrăm vă kơ nhôn lăng hơlen. Lăng ƀôh đe sư đei tôm tơdrong ‘lơ̆ng hơ iă, hlôh vao găh Đảng păng đơ̆ng noh pôk tơmơ̆t.” 

‘Nhŏng Phan Thành Tiến ‘noh đảng viên sơnăm mơlôh ‘nao đei pôk tơmơ̆t tơ̆ chi ƀô̆ koeng kơphô̆ 8 lơ̆m blŭng khei 5/2024 ou ki. ‘Nhŏng Tiến tơbăt, lơ̆m mă oei sinh viên hlôi chă hơlen băt vao găh dôm tơdrong tơchơ̆t kơ Đảng păng hơdrin pơhrăm vă đei jing bơngai mơ̆t lơ̆m Đảng. Lăp đơ̆ng rŏng lĕch ‘măng khoă đăi hŏk brŏk vih bơ̆ jang lơ̆m phương Tân Tiến, ‘nhŏng hơnơ̆ng hơdrin, pơhrăm, ling lang bơ̆ jang keh đang dôm tơdrong pơjao, vang iung jang tôm tong tơdrong jang kơ phương. Năr 8/5 ou ki, ‘nhŏng hlôi jing 1 lơ̆m 2 ‘nu bơngai oei sa ‘lơ̆ng đei pôk tơmơ̆t lơ̆m khul Đảng. ‘Nhŏng Tiến pơma:  “Lơ̆m bơ̆ jang tơ̆ hơnih bơ̆ jang, ba hơnơ̆ng pơm kiơ̆ tơdrong pơkăp păng hơdrin đĭ ai lơ̆m tơdrong jang. Đơ̆ng noh, kơdră chĕp pơgơ̆r hơnih jang pơjing rơvơn vang năm hŏk lăm hŏk găh Đảng păng truh khei 5/2024 ba đei pôk tơmơ̆t lơ̆m khul Đảng. ” 

Đảng ƀô̆ phương Tân Tiến, pơlei tơm Buôn Ma Thuột hrei ou đei 587 ‘nu đảng viên, hop akŏm lơ̆m 20 chi ƀô̆, lơ̆m ou đei 13 chi ƀô̆ koeng kơphô̆, 4 chi ƀô̆ hnam trương păng rim chi ƀô̆ kŏng ang, ƀô̆ đô̆i, hơnih jang pơgang. Dôm sơnăm ou ki, Đảng ƀô̆ phương ling lang jang ‘lơ̆ng bơ̆ jang atŏk tơ iung đảng viên sơnăm mơlôh păng đei Đảng ƀô̆ pơlei tơm Buôn Ma Thuột tơchơ̆t jĭ Đảng ƀô̆ pran kơjăp iăp kơtang tôm tong.

Kiơ̆ kơ ƀok Nguyễn Đình Ninh – Bĭ thư Đảng phương Tân Tiến, sơkơ̆t hơdăh bơ̆ jang atŏk tơ iung đảng viên ‘noh jĭ tơdrong jang tơm, Khul kơdră Đảng phương hlôi pơjao hơnăp jang ăn rim kơdră lơ̆m bơ̆ jang ou. Rim kơdră kăl tơlĕch pơjing trong pơprŏ jang hơdăh lơ̆m chă rơih, pơtho pơjing dôm kon pơlei đei jơhngơ̆m đon ‘lơ̆ng. Rim chi ƀô̆ jei jang keh đang ‘lơ̆ng trong pơjao, đei ‘măng lơ chi ƀô̆ jang keh đang hloh trong tơlĕch ăn. Ƀok Nguyễn Đình Ninh tơbăt găh dôm trong pơjing khul, pơtho pơhrăm păng pôk tơmơ̆t đảng viên lơ̆m Đảng ƀô̆ phương Tân Tiến lơ̆m khei năr hrei ou:    “Rim kon pơlei mưh hŏk đang brŏk vih tơ̆ tơring tim tơchă đei tơdrong jang, ‘nhôn tơmơ̆t đe sư lơ̆m khul yân kuân tư̆ vê̆ dăh mă đoàn viên hơdruh tơdăm vă hơlen, tơgŭm djru, vă đe sư hơdrin vang jang lơ̆m rim tơdrong jang kơ phương. Đơ̆ng noh, nhôn gô rơih dôm bơngai jang ‘lơ̆ng, đei jơhngơ̆m đon hơ iă, đoàn viên gơ̆h găt vă ăn năm hŏk pơhrăm, tơmơ̆t lơ̆m khul Đảng.”

Ƀôh hơdăh yan ou, bơ̆ jang atŏk tơ iung Đảng tơ̆ phương Tân Tiến, pơlei tơm Buôn Ma Thuột hlôi tơlĕch jang ‘lơ̆ng, jơnei. Đơ̆ng noh, atŏk kơtang hơnăp jang tơm dơnơm pơm jŭk yŭk trong hơlou kơ chi ƀô̆ đảng tơring, tơgop lơ̆m atŏk tơ iung mŭk drăm-tơpôl păng tơ iung pơjing Đảng ƀô̆ phương Tân Tiến roi năr roi pran kơjăp iăp kơtang tôm tong.