Pơgê ‘năr 22/8, Kơdră tơm jang tơbôl Bùi Thanh Sơn păng Kơdră tơm jang tơbôl Australia vang pơgơ̆r Hop akŏm Kơdră jang tơbôl Việt Nam - Ausralia ‘măng mă 5 ƀlep ƀât yă Penny Wong năm hơpong tơ̆ tĕh đak Việt Nam ‘măng mă 2. ‘Nâu jĭ tơdrong đei pơgơ̆r hơnơ̆ng rim sơnăm đơ̆ng 2 Anih tơm jang tơbôl.

Tơ̆ Hop akŏm, 2 păh pơma nuh găh tơdrong tơlĕch đei Tơdrong tơchơ̆t pơvei jang hơdoi gĭt kăl Việt Nam - Australia. Năng dơ̆ng khei ‘năr âu ki, jang hơdoi mŭk drăm – tĕch mơdro đơ̆ng 2 tĕh đak tŏk pran, kiơ̆ kơ ‘nŏh jên tĕch mơdro đei lơ̆m sơnăm 2022 vă jê̆ 16 ti USD, pơm ăn tĕh đak Việt Nam jing tĕh đak jang hơdoi tih mă 10 kơ Australia păng Australia jing tĕh đak tĕch mơdro hơdoi tih mă 7 kơ Việt Nam.

Dôm tơdrong jang hơdoi ‘nao nhen tơjră hăm tŏ ‘mi kial tơplih, tơplih ming unh hơyuh tŏk bŏk đei tưk tơiung; lơ̆m nŏh đei jên tơgŭm 105 triu đô la Australia (AUD) mă Australia ‘măn ăn Việt Nam vă man anih jang, pơm trong tơjră hăm tŏ ‘mi kial tơplih păng jang atŏk tơiung unh hơyuh rơgŏh. Kơdră tơm jang tơbôl Australia pơma hơdăh Australia năng kăl tơdrong jang hơdoi păng tơgŭm ăn hơnăp jang tơm đơ̆ng ASEAN; drơ̆ng nơ̆r hơnơ̆ng pơm hơtŏk tơdrong jang hơdoi yoa tơdrong jang tŏk kơjăp ‘lơ̆ng tơ̆ tơring Mekong; pơkăp tơgŭm ăn Việt Nam tơjră hăm tŏ ‘mi kial tơplih păng jang atŏk tơiung unh hơyuh rơgŏh.