Sơng iŏk nơ̆r krao hơvơn đơ̆ng Tổng Bí thư Nguyễn Phú Trọng hăm Hơkăn ƀok, Kơdră chĕp pơgơ̆r Teh đak Võ Văn Thưởng hăm hơkăn ƀok, iŏk đơ̆ng năr 12/12, Tổng Bí thư, Kơdră chĕp pơgơ̆r teh đak Trung Quốc Tập Cận Bình hăm hơkăn ƀok gô năm tơmang Việt Nam lơ̆m 2 năr. ‘Nau ‘măng năm tơmang Việt Nam mă 3 đơ̆ng ƀok Tập Cận Bình hăm Kơchư̆k jang Tổng bí thư, Kơdră chĕp pơgơ̆r Teh đak Trung Quốc, hơdrol ‘noh lơ̆m rim sơnăm 2015, 2017 păng Việt Nam ‘noh Teh đak mă 2, ƀok Tập Cận Bình iung năm tơmang lơ̆m sơnăm au mă ưh kơ đei vang iung jang rim tơdrong pơgơ̆r anai.

Tơchĕng hơlau lơ̆m ‘măng năm tơmang au, ƀar păh gô pơma dơnuh găh tơdrong pơm hơtŏk hơnih tơbăt ‘nao ăn tơgoăt tơgoăl dih băl, pơtrŭt kơtang jang hơdoi tôm tong ƀar păh ƀar teh đak mơ̆t hlom hloh dơ̆ng păng tơpă hloh dơ̆ng. Atŭm hăm dôm tơdrong ‘lơ̆ng rŏ lơ̆m tơgoăt tơgoăl 2 teh đak găh jang hơdoi mŭk drăm-mơdro sa, găh tơgoăt tơgoăl chinh trĭ, jang hơdoi, tơƀơ̆p dih băl khul Đảng, ƀar păh Khul kơdră ƀar teh đak, Kuô̆k hô̆i /Nhân đại, Mặt trận tổ quốc/Chính hiệp adoi nhen ƀar păh rim Hơnih tơm, hơnih jang kăl nhen Jang tơbôl, Khul lĭnh, Kŏng ang, rim tơring sơlam teh đak păng kon pơlei năm ngôi dih băl iŏk đei jơnei hơ iă, hơnhăk đei jơnei tih tên ăn kon pơlei ƀar teh đak.