Ƀan châ̆p hanh hlôi sek lăng ƀok Đinh Tiến Dũng, jang lơ̆m Anih tơm Chĭnh trĭ, Kơdră Khul jang tang măt Kuôk hô̆i jăl 15 pơlei tơm Hà Nội pơdơh jang kơdră kơpal, pơdơh pơm jang. Kiơ̆ tơroi đơ̆ng Anih jang Hơlen Trung ương, lơ̆m khei năr jang Ƀĭ thư Ƀan kan sư̆ đảng, Ƀô̆ trương Anih tơm jên hu jăl jang 2016 - 2021, ƀok âu hlôi pơm glăi Tơchơ̆t gah dôm tơdrong mă đảng viên ưh gơh pơm, Tơchơ̆t gah sơnong jang yuk hơlâu, Tơchơ̆t pơm jang; ưh đei tơnăp lơ̆m tơdrong pơgơ̆r jang vă Ƀan kan sư̆ đảng, Anih tơm Jên hu păng minh ƀar anih jang, tơ-‘ngla bơngai jang hlôi lơ pơm glăi, pơrăm kơnê̆, tơjur đon lui hăm anih jang đảng, anih jang kơpal kơ teh đak.

Băt hơdah sơnong jang hăm Đảng păng kon pơlei, ƀok âu hlôi chih hla bar apinh pơdơh jang dôm kơchư̆k jang đei pơjao păng pơdơh pơm jang. Kiơ̆ tơdrong pơkăp dang ei kơ Đảng, Teh đak păng hơlen lăng tơdrong hơpơi ‘meh đơ̆ng ƀok  Đinh Tiến Dũng, Ƀan châ̆p hanh Trung ương Đảng drơ̆ng nơ̆r asong ƀok Đinh Tiến Dũng pơdơh jang kơchư̆k lơ̆m Anih tơm Chĭnh trĭ, jang lơ̆m Ƀan châ̆p hanh Trung ương Đảng jăl 13. 

Ƀan châ̆p hanh Trung ương Đảng hlôi tơgop nơ̆r gah bơngai jang ăn Anih tơm Chĭnh trĭ tơchơ̆t pơtruh ăn Kuôk hô̆i jăl 15 pôk bơngai jang lơ̆m Anih juăt jang kơpal Kuôk hô̆i jăl 15, jăl jang 2021 - 2026.