Tơ̆ jơ pơma đam, 2 păh hlôi roi tơbăt ăn băl găh tơdrong ‘lơ̆ng đơ̆ng 2 đảng, 2 teh đak, găh dôm tơdrong tơm tơdrong jang tih đơ̆ng 2 đảng khei ‘năr tơjê̆ âu; dăr hơlen tơdrong pơvei jang hơdai, trong tơlĕch jang akŏm păng dôm tơdrong jang tơm lơ̆m tơdrong pơvei đơ̆ng 2 đảng.

2 păh drơ̆ng nơ̆r hơtŏk hloh dơ̆ng hơnăp jang lơ̆m tơdrong jang tơgŭm, pơtho tơdrong tơlĕch jang dôm tơdrong drơ̆ng nơ̆r kơdră kơpal đơ̆ng Kơdră chĕp kơ̆l 2 Đảng păng 2 teh đak; drơ̆ng nơ̆r hơnơ̆ng jang hơdai pơtrŭt hơmet pơ ‘lơ̆ng dôm tơdrong tơhlăk tơhlĭn vă hơtŏk loi dơ̆ng jang hơdai lơ̆m mơdro sa, pơm tơlĕch, tơmơ̆t jên jang đơ̆ng 2 teh đak; pơm tơdrong hiôk ăn anih mơdro sa 2 teh đak bơ̆jang roi ‘năr roi đei yua, mă loi ‘noh lơ̆m tơdrong jang choh jang sa. Ƀok Lê Hoài Trung pơma hơdăh Đảng, teh đak păng kon pơlei Việt Nam ling lang tơgŭm tơdrong jang kach mang trŏ ƀlep đơ̆ng Đảng, teh đak păng kon pơlei Cu-ba ‘nhŏng oh.