Adrol sơ̆, jăl trong đơ̆ng gơng Nước Lương năm tơ̆ thôn T6, xăh Đak Mang, apŭng Hoài Ân, dêh char Bình Định tôch iĕ, hrăt hrot. Lơ̆m pơyan ‘mi, lơ anih tơ̆ jăl trong âu đei đak lơ̆p, kon pơlei yak vih vât tôch pơmat. Đơ̆ng kơsô̆ jên đơ̆ng tơdrong Jang 4 găh tơmât jên man anih jang, pơm trong kăl găh tơdrong jang tơm kơ teh đak atŏk tơiung mŭk drăm tơpôl tơ̆ tơring kon kông păng groi kông, Anih vei lăng kon pơlei apŭng Hoài Ân, dêh char Bình Định tơmât 2,5 ti hlak jên vă pơm hơmet, pơih xă trong đơ̆ng gơng Nước Lương truh thôn T6 păng man bê tông trong tơƀưh pơlei lơ̆m xăh Đak Mang.

Ƀok Đinh Văn Thanh, kon pơlei tơ̆ xăh Đak Mang, apŭng Hoài Ân ăn tơbăt, trong 'nao âu đei pơm hơmet, pơih xă 'lơ̆ng tơgŭm ăn tơdrong yak vih vât, chơ chuĕn tơmam tôch hiôk: “Trong bê tông đei man ‘nao tơgŭm ăn kon pơlei chơ ƀa đơ̆ng kơdơ chŭn vih tơ̆ hnam tôch hiôk. Trong ‘nao tơgŭm ăn kon pơlei yak vih vât hiôk, sơđơ̆ng ƀiơ̆ pơting hăm dôm sơnăm adrol sơ̆”.

Apŭng Hoài Ân chih hơdăh tơmât jên pơm hơmet anih jang, trong nơnăm ‘nŏh jĭ “’long tưk” gĭt kăl, vang tơgop pơm hơtŏk mŭk drăm, tơpôl tơ̆ tơring pơmat tat dêh hlŏh, tơring hơtăih yăih. Dôm tơring đei tơdrong jang truh, kon pơlei mât 1 ƀơ̆r đon tơgŭm ăn.

Ƀok Nguyễn Xuân Phong, Phŏ Kơdră vei lăng kon pơlei apŭng Hoài Ân, dêh char Bình Định ăn tơbăt, tơ̆ tơring oei tơmât hơdai dôm tơdrong jang tơm kơ teh đak, tưk tơiung tơdrong pran ‘lơ̆ng đơ̆ng tơring pơjing trong choh jang xa đei iŏk yoa kơjăp păng tơgŭm pơih xă, hơtŏk tơdrong jang hơdoi vă pơm hơtŏk kơjă tơmam drăm hơdai hăm tĕch mơdro tơmam jang đei:

“Tơlĕch jang tơdrong atŏk tơiung choh jang xa ăn tơring kon kông, tơgŭm bơ̆n tơđăh ‘lơ̆ng, kon yŏng păng tơmam choh jang xa vă kon pơlei jang kiơ̆ khoa hŏk ki thuơ̆t. Dôm trong choh jang xa đei yoa lơ hơnhăk ba lơ mŭk drăm ăn tơring kon kông vă pơm tơplih đon tơchĕng lơ̆m tơdrong choh jang, pơm tơlĕch tơmam đơ̆ng choh jang xa lơ̆m 1 hơgăt teh, pơgar. Đơ̆ng noh, pơm hơtŏk iŏk yoa, tưk tơiung mŭk drăm lơ̆m unh hnam, tơjur ƀiơ̆ kơsô̆ unh hnam tơnuh tơ̆ tơring”.

Sơnăm 2024, jên vă tơlĕch ăn tơdrong jang tơm kơ teh đak atŏk tơiung mŭk drăm tơpôl tơ̆ tơring kon kông păng groi kông dêh char Bình Định hlŏh 412 ti. Truh ‘năr 31/5, dôm tơring lơ̆m dêh char Bình Định tơlĕch đei hlŏh 50,7 ti hlak jên, iŏk đei 12,3%. Tơdrong tơlĕch bơ̆ jang dôm tơdrong jang găh Tơdrong jang tơm kơ teh đak âu oei đei 1,2 tơdrong pơmat tat. Anih vei lăng kon pơlei dêh char Bình Định hơnơ̆ng vei kơjăp dôm Khul jang đơ̆ng lơ anih jang kơ dêh char vă hơlen năng dôm tơdrong jang đei păng athei, pơtho tơƀôh, hơmet pơ ‘lơ̆ng dôm tơdrong tam mă ‘lơ̆ng, tơhlăk tăk mư̆h bơ̆ jang dôm tơdrong jang găh Tơdrong jang tơm kơ teh đak.

Ƀok Đinh Văn Lung, Kơdră Anih vei lăng hơdrĕch kon kông dêh char Bình Định ăn tơbăt, anih jang athei dôm tơring năng kăl truh tơdrong tơroi tơbăt, hơtŏk hrenh tơdrong jang đơ̆ng dôm tơdrong jang tơm kơ teh đak găh atŏk tơiung mŭk drăm, tơpôl tơ̆ tơring kon kông păng groi kông: “Lơ tơdrong tơgŭm, kơna dôm bơngai jang roi tơbăt athei hlôh vao kơjăp. Mă 2 athei đei lơ khul grŭp, lơ anih jang đei ƀơm truh dôm tơdrong jang ‘nâu vă đe sư roi tơbăt ăn kon pơlei hlôh. Tơdrong jang đei lơ khul chĕp kơ̆l đảng tơ̆ tơring kŭm tơrek truh, bơ̆ jang roi tơnăp ƀiơ̆, hơnăp jang roi tŏk mưh chă roi tơbăt, krao hơvơn vă pơm thoi yơ kon pơlei đei xa yoa đơ̆ng tơdrong jang ‘nâu, pơm ăn tơdrong arih xa roi ‘lơ̆ng ƀiơ̆”./.