Tŏk bŏk lơ̆m đak pŏh yă đơđôl, achon tơmo Cô Lin tơ-‘mlơ̆k chhing dang lĕ dur đông tŏk bŏk đak dơsĭ glơch glach. Dur ‘noh đei dôm ƀô̆ đô̆i chă ư̆ akhan “lục giác đài”. Achon dơsĭ đei jing tơ̆ kơpal tơmo san hô đak lơ̆p, kơ yuơ lơ loh tơdrong hơrih sa kơ rim kang ƀô̆ ƀô̆ đô̆i oei tơƀơ̆p tôch lơ tơdrong tơnap tap. Hăm trong iung bơ̆ jang hơdrô̆ hơdrăn, tŏ ‘mi kial ưh sơđơ̆ng, rim sơnăm kang ƀô̆ ƀô̆ đô̆i Achon Cô Lin sơng 6 khei tŏ păng 6 khei ‘mi. Dôm năr đak dơsĭ dơdrŏ, đak pŏh yă jăng, kial tơhlu kơtang hlôi pơm kơnê̆ kơtang truh tơdrong jang kơ achon dơsĭ, mă lei ưh kơ ‘nhoen tơ̆ hơnăp tơnap tap rim ƀô̆ đô̆i hơnơ̆ng prăt măng prăt năr gak vei lăng sơđơ̆ng vơvơ̆ng plĕnh, tơring đak dơsĭ kơ Teh đak. Thiếu tá Nguyễn Xuân Duy, kơdră chĕp pơgơ̆r achon dơsĭ Cô Lin tơbăt:“Rim jơhnơr kang ƀô̆, ƀô̆ đô̆i jei lăng kơjăp tơdrong joăt joe kơ achon dơsĭ păng mă kăl ‘nŏh tơdrong jang kơ achon dơsĭ; hơnơ̆ng vei kơjăp adoi nhen iung jang kiơ̆ kơjăp tơdrong joăt joe truh hloi lơ̆m tơdrong chă pơhrăm, bơ̆ jang, tơgop vei kơjăp tơdrong pơm tơm kơdih đak dơsĭ achon dơsĭ, lơ̆m hơgăt teh iŏk jang vei lăng”.

Lơ̆m dôm sơnăm au ki, kang ƀô̆, ƀô̆ đô̆i rim achon dơsĭ tơ̆ Trường Sa ưh kơ lê̆ đei tơdrong pơhơi, hơnơ̆ng bơ̆ jang ‘lơ̆ng hơmet pơ ‘lơ̆ng dôm tơdrong, rim duk teh đak đe pơm glăi tơdrong pơm tơngla đak dơsĭ kơ teh đak bơ̆n. Kiơ̆ đơ̆ng Trung tá Trần Danh Hoàng, Kơdră chĕp pơgơ̆r achon Sinh Tồn: Kang ƀô̆, ƀô̆ đô̆i bơ̆ jang tơ̆ au ưh kơ đei năr pơdơ̆h, ling lang kơchăng iung tơblăh ‘nŏh jing tơdrong jang tơm hloh. Dôm tơdrong đei ƀôh au to tơ̆ đak dơsĭ jei ƀôh ngăl, dăr lăng kơjăp păng tơroi tơtom vă tơlĕch trong jang hơmet pơ ‘lơ̆ng tĕnh koăng păng trŏ ƀlep, ưh kơ lê̆ đei tơdrong ưh kơ tom băt.“Nhôn năm tơ̆ achon dơsĭ hlôi iung jang tơdrong jang pơjao, 'nau jĭ tơdrong chơt hiôk hloh păng hơnăp jang gĭt kăl kơ bơngai ƀô̆ đô̆i pơma hơdrô̆ păng kon pơlei groi teh Việt pơma atŭm. Kơdră chĕp pơgơ̆r achon dơsĭ pơtho khan ăn ‘nhŏng oh ƀôh hơdăh ‘nau jĭ klơm klak, jĭ tơdrong gĭt kăl kơ mĕ ƀă yă ƀok. Hơnăp jang kơ rim jơhnơr mưh năm tơ̆ Trường Sa ‘noh kăl hơnơ̆ng jang lơ hloh ƀar ‘măng, pêng ‘măng; ling lang kơrŭn đĭ jơhngơ̆m, hơdrin đĭ ai vă Teh đak, vă kon pơlei oei tơ̆ groi teh sơđơ̆ng jơhngơ̆m hloh dơ̆ng. Nhôn hơnơ̆ng vei kơjăp jơ̆ng ti chĕp phao kơtoang, ling lang jing hơnih gơnang kơjăp iăp kơtang vă kon pơlei rôp ka hơdang tơklep kơjăp hăm đak dơsĭ”.

Tơ̆ Achon Trường Sa, tŏ ‘mi kial đei pơjing 2 pơyan, pơyan phang păng pơyan ‘mi. Kơ yuơ ưh kơ đei đak mŏng kơna tơdrong iŏk yua đak ‘mi tơ̆ achon chă pơkom tôch kơtang. Lơ̆m pơyan phang, rim ‘măng kang ƀô̆ ƀô̆ đô̆i lăp đei đơ̆ng 3-5 kơlich đak vă chă sŏ nhăn kơ ‘năr. Mă lei, lơ̆m achon dơsĭ jơk ƀlĕk kơ dơnơm ‘long păng dôm pơgar ‘nhot hăm rim kơ loăi ‘nhot sa, đei đăi kơmau jơk ‘noh ưh kơbăt dôm yơ đak pơ-uh pơ-ang lĕch, jơhngơ̆m jang greh hrat đơ̆ng rim jơhbnơr kang ƀô̆, ƀô̆ đô̆i tơ̆ au.  Thiếu tá Võ Văn Hiệp, achon dơsĭ Đá Đông A tơroi: dơ̆ng tơ̆ hơnăp dôm tơdrong tơnap tap, kang ƀô̆, ƀô̆ đô̆i Trường Sa đơ̆ng jơhnơr au truh jơhnơr anai hlôi chă pơtho khan dih băl trong vă kĕ “Krơ̆ng kơtŏ pơđang, tang kĕ ‘mi”.“Mă đơ̆ng tơnap tap mă lei đơ̆ng rŏng jơ pơhrăm nhôn pơgĕnh chă choh jang sa. Đak sŏ nhă jei iŏk yua pơkom, ‘nhao mŭh măt đang ‘noh tơruih ăn kơ ‘nhot. Đei ‘măng, tơ̆ gơmăng nhôn chĕp ŭnh ƀin chă tơ̆k rôp ket hơdrông, hơbau sa ‘nhot. Kơmau jơk ƀlĭk kơ dơnơm ‘long, ƀrông ƀrang kơ pơkao ... pơm ăn kơ nhôn hiơt hiong ƀiơ̆ jơhngơ̆m gleh hrat đơ̆ng rŏng jơ pơhrăm tơblăh. Pơm ăn kơ jơhngơm đon bơ̆n nhen lĕ oei tơ̆ groi teh đĕch”.

Ƀơm răm hơnơ̆ng đơ̆ng tŏ pơđang, kial hơbut hơbông chrih chrĕng, tơ̆ achon dơsĭ găh lơ ‘noh san hô păng chuơ̆h, đak hmă găh lơ jĭ gơnang đơ̆ng ‘mi mă đei. Mă lei kăl ƀôh kơmăt chă lăng dôm pơgar ‘nhot hla hơnoăn, hla sơƀei, plui, tôl, tơneh ... plei trĭu trăo; dôm dơnơm ‘long, ‘long pơrŏ mă ƀôh hơdăh jơ̆ng ti gơ̆h hơgei kơ dôm bơngai ƀô̆ đô̆i achon dơsĭ. Mă đơ̆ng tơdrong hơrih sa oei ƀĕnh ƀang tơnap tap, kơƀăh kơƀôch pơtêng hăm tơ̆ groi teh mă lei jơhngơ̆m đon kang ƀô̆, ƀô̆ đô̆i oei tơ̆ rim achon dơsĭ ling lang sơkơ̆t hơdăh kơchăng kơtang iung tơblăh, vei lăng năng tông tơdrong pơm tơ-‘ngla tơring đak dơsĭ, achon dơsĭ păng tơring hơlam đak dơsĭ kơ Teh đak. Thượng tá Nguyễn Công Chính, Chinh trĭ viên achon dơsĭ Trường Sa tơbăt: Đei bơ̆ jang tơ̆ achon Trường Sa ‘noh jĭ jơhngơ̆m đon hưch hanh hơmanh bơnê kơ rim kang ƀô̆ ƀô̆ đô̆i.“Nhôn hơnơ̆ng sơkơt hơdăh tơdrong jang đei pơjao păng hơnơ̆ng băt hơdăh găh tơdrong joăt joe ‘lơ̆ng liĕm kơ hơnih jang, tơdrong plang pham lĕch sĕch huŏng, vang tơgop đĭ ai đơ̆ng rim jơhnơr mih ma ‘nhŏng oh yak hơdrol. Nhôn ling lang hưch hanh hơmanh bơnê hăm tơdrong joăt joe ‘noh păng ling lang chă pơtho khan dih băl vei lăng kơjăp păng kiơ̆ yok rok jơ̆ng kơtang hloh dơ̆ng tơdrong joăt joe kơ Khul Trường Sa nuih mơng. Rim ‘nu kang ƀô̆ ƀô̆ đô̆i Trường Sa kơrŭn đĭ ai vei kơjăp tơdrong pơm tơ-‘ngla achon dơsĭ, tơring hơlam đak dơsĭ kơ Teh đak. Ling lang lăng kơjăp “achon dơsĭ ‘noh hnam, đak dơsĭ ‘noh pơlei pơla kơdih” kơrŭn đĭ ai vei kơjăp iăp kơtang achon dơsĭ, đak dơsĭ kơ Teh đak”.

    Lơ̆m khei ‘năr hơrih sơ̆ Ƀok Hô hlôi pơkă: “Sơ̆ bơ̆n lăp đei gơmăng păng bri, hrei au bơ̆n đei năr, đei ‘năr, đei đak dơsĭ, jih đak dosĭ bơ̆n kơjung ‘lơ̆ng liĕm, kơna bơ̆n kơrŭn đĭ ai vei lăng năng tông hăp mă gei”, kang ƀô̆, ƀô̆ đô̆i păng kon pơlei Achon dơsĭ Trường Sa tơgoăt mĭnh nơ̆r ƀơ̆r đon, yak hloh rim tơdrong tơnap tap hrat hrĭn, kơƀăh kơƀôch, ling lang kơchăng, chĕp phao kơjăp iăp kơtang, vang iung tơblăh nuih mơng, jang keh đang ‘lơ̆ng tơdrong jang vei lăng năng tông tơdrong pơm tơm kơdih kơ Teh đak.