Ƀô̆ trương Phạm Thị Thanh Trà ăn tơbăt, Việt Nam jĭ teh đak đei lơ tơdrong khop, hăm 16 tơdrong lui, 36 anih pơgơ̆r lui khop, 24 trĭu bơngai kiơ̆ lui, đei 27% kơsô̆ măt kon pơlei; lơ̆m noh khiơ̆ khop kŏng yăo đei 7 trĭu ‘nu. Rim tơdrong lui khop păng bơngai lui khop tơguăt tơguăl, yak hadoi hăm kon pơlei păng teh đak lơ̆m tơdrong iung tơjră pơrơngei hơdrung hơdrĕch adoi nhen lơ̆m tơdrong jang tơplih pơm jang kiơ̆ trong ‘nao hrei âu.

Ƀô̆ trương Anih tơm Nô̆i vŭ Phạm Thị Thanh Trà sơkơ̆t hơdah, hăm sơnong jang kơpal kơ teh đak vei lăng gah tơdrong lui, Anih tơm Nô̆i vŭ gô pơtoi tơrĕk tơgŭm, jang hadoi hăm Anih pơgơ̆r tơdrong khop Việt Nam, pơm trong hiôk vă Kơdră jang tang măt ăn Hnam khop Tơm tơ̆ Việt Nam pơm jang tơnăp dôm sơnong tơlĕch jang tơ̆ Việt Nam. Ƀok soi tih, Ƀô̆ trương Anih tơm jang Tơbôl kơ Hnam khop Tơm Paul Richard Gallagher lui ngeh Jơnŭm kon pơlei lui Kŏng yăo Việt Nam gô đei lơ tơgop hloh dơ̆ng lơ̆m tơdrong hơtŏk tơ-iung teh đak Việt Nam. Atŭm hăm noh, hơpơi ‘meh hăm tơdrong đei măt đơ̆ng Kơdră jang tang măt mă blŭng kơ Hnam khop Tơm tơ̆ Việt Nam, tơdrong tơbôl đơ̆ng Hnam khop Tơm păng Việt Nam pơtoi đei jơnei kăp gĭt hloh.