Tơ̆ jơ pơm jang, Anih jang vei lăng kon pơlei dêh char Đăk Lăk hlôi tơbang 18 tơdrong đei tơrĕk truh tơnap tap, tơhlăk tơhlĭn lơ̆m tơdrong jang vei lăng đơ̆ng jơnŭm pơgơ̆r teh đak gah mŭk drăm cham char. Lơ̆m noh, tơhlăk tăk hloh gah vei lăng teh đei tơm a hla chă đơ̆ng anih mir đak lar. Mă lơ teh đơ̆ng anih mir đak lar pơdreo ăn tơring dang ei kơyuơ Anih jang vei lăng kon pơlei xah iŏk vei lăng.

Pơma sơkơ̆t pơtôch jơ pơm jang, Ƀô̆ trương Anih tơm vei lăng Mŭk drăm Cham char Đặng Quốc Khánh ăn tơbăt, khul kơpal kơ anih jang tơm pơm jang hăm dôm dêh char ‘noh vă pơklaih dôm tơnap tap, tơhlăk tơhlĭn ăn tơring. Atŭm hăm noh, Anih jang tơm adoi iŏk nơ̆r tơgop đơ̆ng dôm tơring vă dah hrôih chih akŏm keh đang Tơchơ̆t tơmơ̆t iŏk yua Luơ̆t Teh sơnăm 2024 lơ̆m tơdrong hơrih. Hăm tơdrong tơnap tap gah teh mir đak lar, Ƀô̆ trương Anih tơm vei lăng Mŭk drăm Cham char Đặng Quốc Khánh athei dêh char Đăk Lăk hơlen lăng dơ̆ng tôm tơdrong vă ah Luơ̆t Teh sơnăm 2024 đei iŏk yua noh gơh iŏk jang tơnăp hăm lơ hơgăt teh hlôi đei.