Sơng iŏk nơ̆r hơvơn đơ̆ng Bơngai jang lơ̆m Anih tơm Chĭnh trĭ, Kơdră Anih jang gah tơdrong jang tơbôl Trung ương Đảng Cộng sản, Ƀô̆ trương jang tơbôl kơ teh đak Trung Hoa Vương Nghị, Ƀô̆ trương jang tơbôl Bùi Thanh Sơn chĕp kơ̆l Khul kơpal Việt Nam năm truh Hop akŏm. Pơma ah Hop akŏm, Ƀô̆ trương Bùi Thanh Sơn sơkơ̆t hơdah Việt Nam lăng tơgĭt păng pơtoi tơgop kăp gĭt ăn tơdrong jang hadoi kơ 6 teh đak.

Hơyak kiơ̆ tơchơ̆t pơjing khei năr anô̆ anăp kơnh ‘lơ̆ng rŏ ăn kon pơlei, Ƀô̆ trương tơlĕch 4 grŭp jang tơm ăn jang hadoi MLC lơ̆m khei năr truh, lơ̆m noh hơtŏk dôm tơdrong jang kŏng ngĭp dơnơm, dar deh tơplih đơ̆ng jang chă pơlăp vă chă hơlen pơm tơlĕch; hơtŏk pran tơplih kơsô̆ kiơ̆ pơma đam gah trong jang mŭk drăm kơsô̆ păng vei sơđơ̆ng mạng, jang hadoi hơtŏk bơngai jang kơsô̆, pơlei tơm gơh hơgei, pơ-‘lơ̆ng kơsô̆ jang kơ dôm anih jang mŭk drăm iĕ ioch, pah ai păng  iĕ.