Đơ̆ng rŏng tơmơ̆ng đe kơdră dêh char Đăk Lăk tơroi hơdăh găh tơdrong pơm tơxŭl tơxăl tơpôl ăh pơgê năr 11/6 âu ki, Ƀô̆ trương Tô Lâm xơkơ̆t hơdăh, tơdrong đei ƀôh tơ̆ apŭng Cư Kuin, dêh char Đăk Lăk ăh pơgê năr 11/6 đei lăng noh tơdrong tơdrŭt kơnê̆, pơm tơxŭl tơxăl tơpôl hli hlơt, kơnê̆ kơnôt hloh. Anih tơm Kŏng an hlôi pơgơ̆r dôm anih linh tenh kuăng chă ƀa trui rôp khul bơngai âu, atŭm hăm noh axong khul jang vei xơđơ̆ng tơpôl, vei xơđơ̆ng tơdrong vihv ơ̆t ăn kon pơlei.

Ƀô̆ trương Tô Lâm xơkơ̆t hơdăh, truh dang ei, tôm bơngai lơ̆m khul tơdrŭt kơnê̆ âu hlôi ƀơm rôp vei, tơpôl lơ̆m tơring teh kơ dêh char Đăk Lăk xơđơ̆ng 'lơ̆ng, tơdrong hơrih kon pơlei adoi xơđơ̆ng. Ƀô̆ trương adoi pơkăl dêh char Đăk Lăk lơ̆m khei năr truh ưh gơh pơhơi pơhŏ, mă athei kơchăng hăm tơdrong vei xơđơ̆ng tơpôl đơ̆ng tơring truh anih jang, atŭm hăm noh, athei hơtŏk tơnăp xơnong jang kơ đe kơdră kơpal. Lơ̆m vei xơđơ̆ng tơpôl teh đak tơ̆ dôm anih tơm dơnơm, mă kăl noh tơring Tây Nguyên, kăl hơtŏk pran, jang hadoi kơjăp đơ̆ng tang găn lơ̆m tơpôl păng hơmet kơjăp lơ̆m tơdrong juăt jang.

Tơ̆ jơ lêh, Ƀô̆ trương Tô Lâm hlôi pôk ƀăng bơnê đơ̆ng Anih tơm Kŏng an ăn 5 kon pơlei jang rơgei lơ̆m tơdrong jang tôm kon pơlei vei xơđơ̆ng tơpôl Teh đak, tơgop vei xơđơ̆ng tơpôl tơ̆ tơring tơrang.