Lơ̆m khei, Kŏng ang rim hơnih jang, tơring hlôi dăr lăng, phă pơrăm hloh 3.000 ‘măng pơm glăi tơdrong sơđơ̆ng tơpôl, rôp 6.300 ‘nu bơngai pơm glăi. Hlôi pơrô̆ ƀôh hloh 2.000, 3.469 ‘nu bơngai pơm glăi găh ma tuý, rôp iŏk hloh 67 kĭ heroin, hloh 217 kĭ păng hloh 89.000 găr ma tuý.

Iung pơma pơtôch Hop akŏm, Bộ trưởng Tô Lâm athei, Kŏng ang rim hơnih, tơring kăl jang ‘lơ̆ng bơ̆ jang vei lăng sơđơ̆ng teh đak, iung jang dăr lăng hơlen kơjăp dôm tơdrong lơ̆m apŭng plĕnh teh, tơring vă tơtom pơchoh trong ăn kơ Đảng, Teh đak rim trong jang, trong tơgŭm djru trŏ lăp. Sơđơ̆ng ‘lơ̆ng dôm tơdrong lơ̆m tơring, sơđơ̆ng mŭk drăm, sơđơ̆ng mạng, sơđơ̆ng chinh trĭ, sơđơ̆ng mơ̆t lĕch lơ̆m teh đak ... Atŏk kơtang bơ̆ jang dăr lăng rim tơdrong pơm glăi găh lơ̆m Hơnih bơ̆ jang Pơrô̆ chĕp pơgơ̆r Trung ương găh tang găn sa pơgơ̆m pơjĭp, pơm glăi tơdrong au to. Iung jang tơlĕch jang rim trong jang tang găn hơlau, iung tơjră phă pơrăm hăm tơdrong pơm glăi tih, mă kăl “pơm glăi tơ̆ trong kơphô̆”, pơm glăi “ăn tŏk iŏk hăm jên cheh lơ”, pơm glăi tơdrong yoch tih lơ̆m tơdrong jang mạng; akŏm iung tơjră phă pơrăm kĕ dôm tơdrong pơm glăi găh ma tuý…