Hơiă hăm Bơngai tang măt hlôi jang đang ‘lơ̆ng tơdrong jang tơ̆ Việt Nam, Ƀok Kơdră Tô Lâm pơma hơdăh, Anih tơm vei lăng Công an chih răk dôm tơdrong adrin đơ̆ng Bơngai tang măt vang hơmet kơjăp, tưk tơiung tơdrong pơvei jang hơdoi gĭt kăl tôm tơdrong Việt Nam - Nhật Bản pơma atŭm, đơ̆ng Anih tơm vei lăng Công an Việt Nam păng dôm anih jang kiơ̆ luơ̆t kơ Nhật Bản pơma adrô̆.

Vă hơnơ̆ng pơm hơtŏk tơdrong pơvei jang hơdoi Việt Nam- Nhật Bản tŏk ‘lơ̆ng hlŏh dơ̆ng, Ƀok Kơdră Tô Lâm athei 2 păh hơtŏk tơdrong ‘lơ̆ng đơ̆ng nơ̆r roi tơbăt; jang hơdoi kơjăp găh dôm tơdrong tang găn tơdrong yoch thoi so păng kiơ̆ chăl ‘nao; Vang roi tơƀôh, pơtruh nơ̆r tơbăt gĭt kăl truh hăm kơdră chĕp kơ̆l 2 teh đak. Bơngai tang măt hmach thơ thou ăn tơdrong jang tơbôl Việt Nam-Nhật Bản roi đunh roi tŏk ‘lơ̆ng; pơma hơdăh, đơ̆ng rŏng kơ vih tơ̆ teh đak, mă jang kơchư̆k kiơ, vă hơnơ̆ng tơrek truh, tưk tơiung tơdrong pơvei âu roi đunh roi tŏk ‘lơ̆ng păng pran kơjăp hlŏh dơ̆ng.