Pơgê brei, 17/3, tơ̆ Anih jang kơ Anih chĕp kơ̆l pơgơ̆r đảng dêh char Lâm Đồng đei pơgơ̆r Hop akŏm tơlĕch tơdrong tơchơ̆t đơ̆ng Anih tơm Chinh trĭ găh tơdrong jang kăn ƀô̆. Ƀok Nguyễn Thái Học, Phŏ Kơdră Anih jang Nội chính Trung ương, Kơdră jang lơ̆m Anih pơgơ̆r hơmet ming tư phap Trung ương đei nơ̆r athei jang pơgia kơchư̆k pơm Bí thư đảng dêh char Lâm Đồng.

Vă pơm ‘lơ̆ng ăn tơdrong chĕp kơ̆l pơgơ̆r tôm tơdrong, hơnơ̆ng đơ̆ng Anih tơm Chinh trĭ, Ban Bí thư păng Trung ương Đảng hăm Anih chĕp kơ̆l đảng dêh char Lâm Đồng, Anih tơm Chinh trĭ tơchơ̆t ăn ƀok Nguyễn Thái Học, Phŏ Kơdră Anih jang Nội chính Trung ương vang mât jang lơ̆m khul kơdră chĕp kơ̆l pơgơ̆r păng iŏk jang pơgia kơ chư̆k pơm Bí thư đảng dêh char Lâm Đồng đơ̆ng 2020-2025.

Ƀok Nguyễn Thái Học rơnĕh sơnăm 1972, pơlei tơ̆ xăh Hòa Quang Bắc, apŭng Phú Hòa, dêh char Phú Yên; hŏk Tiến sĩ khoa hŏk chinh trĭ, kư nhân Luơ̆t; kư nhân chinh trĭ. Pơma ƀât iŏk kơchư̆k jang, Bí thư đảng dêh char Lâm Đồng kơplăh dang ei ƀok Nguyễn Thái Học tơƀôh đon čhôk ‘nă mưh đei Anih tơm Chinh trĭ, Ban Bí thư Trung ương Đảng, Anih pơgơ̆r Trung ương lui, pơjao ăn hơnăp jang ‘nao.