Ƀlep lơ̆m năr tơbăt 76 sơnăm Năr Bơngai rơka lôch dŏng teh đak, lơ̆m ‘măng iung năm ngôi păng bơ̆ jang tơ̆ dêh char Đak Lăk, pơgê năr 24/7, ƀok Phan Đình Trạc, Kơdră chĕp pơgơ̆r Hơnih bơ̆ jang Nội chính Trung ương atŭm hăm khu bơ̆ jang hlôi năm hơpong Pơsat teh đak dêh char păng năm ngôi, pơma dơnuh hăm rim ŭnh hnam đei bơngai lôch răm lơ̆m jơ ‘năr oei bơ̆ jang tơ̆ apŭng Cư Kuin, dêh char Đak Lăk.

Tơ̆ hnam rim bơngai lôch dŏng teh đak, khul bơ̆ jang hlôi soh hlôt nhang ƀlŏk hơdơ̆r ‘mêm mơnat hăm kang ƀô̆, kŏng ang hlôi lôch răm kơ yuơ vei lăng  năng tông oei sa sơđơ̆ng ăn kon pơlei; năm ngôi, hơlêm păng tơbăt jơhngơ̆m đon vang ơ̆h sơ ‘ngon atŭm hăm rim ŭnh hnam đei bơngai lôch dŏng teh đak.

Tơbăt jơhngơ̆m đon ‘mêm mơnat hăm ŭnh hnam rim kang ƀô̆, kŏng ang găh tơdrong ơ̆h sơ ‘ngon au, ƀok Phan Đình Trạc, Kơdră chĕp pơgơ̆r Hơnih bơ̆ jang Nội chính Trung ương sơkơ̆t hơdăh, Đảng, Teh đak ling lang lăng ba, jang kiơ̆ ‘lơ̆ng trong bơ̆ jang tơgŭm djru hăm kang ƀô̆, kŏng ang ƀô̆ đô̆i lôch răm; đei lơ trong tơgŭm djru vă ŭnh hnam rim bơngai lôch dŏng teh đak hrôih yak hloh tơdrong hiong răm tih tên au.

Hơdrol kơ ‘noh, Khul bơ̆ jang hlôi năm soh hlôt nhang, ‘măn gơvang pơkao tơ̆ Pơsat teh đak dêh char Dak Lak.