Đơ̆ng rŏng kơ khul kơdră dơnơm păng kơdră juăt jang lơ̆m ƀan ƀĭ thư pơma đam, ƀok Tổng Bí thư, Kơdră teh đak bơ̆n Tô Lâm sơkơ̆t hơdah minh ƀar sơnong jang mă tôm Đảng păng anih jang chĭnh trĭ athei akŏm sek tơlang lơ̆m khei năr truh nhen: Akŏm hơlen dôm tơdrong jang tam mă keh đơ̆ng dang ei truh đĭ sơnăm 2024 păng tơlĕch dôm trong jang vă keh đang tenh kuăng tơnăp; pơtoi hơmet vă ‘lơ̆ng kơjăp ăn Hop akŏm mă 10 Ƀan châ̆p hanh Trung ương Đảng jăl 13; rim anih jang hơmet ăn Hop akŏm mă 14 kơ Đảng athei tơlĕch dôm tơdrong jang trŏ nhen tơchơ̆t tơlĕch.

Hăm tơdrong hơtŏk mŭk drăm – tơpôl, athei akŏm pơklaih dôm tơnap tap, tơhlăk tơhlĭn, vă pơm trong hiôk ăn anih jang mŭk drăm gơh hơtŏk asong jang tĕch pơdro hiôk hian đei jơnei hloh, pơm ăn kon pơlei păng anih jang mŭk drăm asong jang hiôk hian hloh. Hop akŏm adoi pơđăp, tơgop nơ̆r păng tơlĕch trong sek tơlang lơ tơdrong kăp gĭt nai kơ teh đak lơ̆m khei năr truh.