Lơ̆m khei năr oei tơmang teh đak Phalăng, ƀok Tổng Bí thư, Kơdră teh đak bơ̆n Tô Lâm hlôi akŏm Lêh sơng; tơƀơ̆p, pơma đam hăm Kơdră teh đak Phalăng Emmanuel Macron; pơma đam hăm Kơdră Thươ̆ng viê̆n Phalăng; sơng Ƀĭ thư dơnơm kơ Đảng Cộng sản Phalăng, Jơnŭm jang hadoi Phalăng - Việt Nam; năm hơpong Anih jang păng pơm jang hăm Kơdră dơnơm kơ UNESCO. Phalăng păng Việt Nam ră hơdah sơnong jang kăp gĭt kơ trong jang lơ teh đak, lơ̆m noh Liên hơp kuôk jing anih tơm, atŭm hăm noh sơkơ̆t hơdah pơm kiơ̆ Tơchơ̆t Liên hơp kuôk, mă kăl noh tơdrong kăp gĭt kơ hơtŏk păng vei sơđơ̆ng sơnong pơm tơm kơdih kơ kon bơngai păng dôm tơdrong hiôk hian hăm tơdrong hơtŏk tơ-iung kơ rim teh đak.

Ƀar pah sơkơ̆t hơtŏk tơgŭm păng jang hadoi lơ̆m pơgơ̆r hop akŏm tơ̆ tơring, mă kăl noh ASEAN, păng apŭng plenh teh, lơ̆m noh đei Jơnŭm jang apŭng plenh teh dôm teh đak đei yua nơ̆r Phalăng.