Ƀok Tổng Bí thư Nguyễn Phú Trọng hmach bơnê kơ Thủ tướng Roman Golovchenko năm tơmang Việt Nam păng thơ thâu hăm teh đak Belarus hlôi đei iŏk jơnei lơ̆m tơdrong pơtoi vei sơđơ̆ng chĭnh trĭ, hơtŏk teh đak, vei sơđơ̆ng tơdrong pơyua ăn tơpôl păng hơtŏk anih dơ̆ng lơ̆m tơring.

Hmach bơnê kơ tơdrong đei jơnei ‘lơ̆ng rŏ đơ̆ng pơma đam đơ̆ng Thủ tướng Belarus hăm đe Kơdră kơpal Việt Nam, ƀok Tổng Bí thư Nguyễn Phú Trọng hmach bơnê kơ dôm tơdrong hơtŏk ‘lơ̆ng lơ̆m tơbôl đơ̆ng Việt Nam păng Belarus; tơƀôh đon lui hăm ‘măng năm tơmang âu gô pơm trong ‘nao hơtŏk jang tơbôl juăt jue lơ tơdrong đơ̆ng Việt Nam păng Belarus lơ̆m khei năr truh. Ƀok Tổng Bí thư Nguyễn Phú Trong adoi pơma đam hăm Thủ tướng Roman Golovchenko gah minh ƀar trong jang pran vă hơtŏk tơdrong tơbôl juăt jue kơ 2 teh đak tŏk minh jăl ‘nao, pơma đam gah tơdrong hlôh vao lơ̆m hơtŏk jang hadoi. Đảng Cộng sản Việt Nam kơchăng hơtŏk ‘lơ̆ng tơdrong tơbôl hăm dôm đảng tơm kơ teh đak Belarus.