'Măng năm tơmang kơpal truh Việt Nam đơ̆ng ƀok Tổng Bí thư, Kơdră teh đak Trung Quốc Tập Cận Bình atŭm hăm hơkăn ƀok păng Khul kơpal tang măt ăn kơ Đảng, teh đak Trung Quốc hơpơi 'meh đei lơ tơdrong 'nao lơ̆m tơbôl kơ 2 teh đak. Noh jing hơpơi 'meh gah minh “anih dơ̆ng 'nao”, “jơhngơ̆m pran 'nao” lơ̆m tơbôl 2 pah Việt Nam-Trung Quốc. Tơ̆ jơ pơma đam, 2 pah atŭm pơđăp gah tơdrong hơtŏk anih dơ̆ng 'nao ăn tơbôl 2 pah, hơtŏk jang hadoi tôm tơdrong kơ 2 teh đak gơh kơjăp hloh. Lơ̆m 20 sơnăm kơ âu, Trung Quốc jing teh đak jang tĕch pơdro pran hloh kơ Việt Nam păng dang ei Việt Nam jing teh đak jang tĕch pơdro pran hloh kơ Trung Quốc lơ̆m ASEAN, teh đak jang tĕch pơdro pran mă 4 kơ Trung Quốc lơ̆m kơpal teh (đơ̆ng rŏng Mih, Nhâ̆t, Hàn Quốc).

Tơmam tĕch răt kơ 2 pah tŏk 9 'măng đơ̆ng 20 tih đôlar ah sơnăm 2008 tŏk jê̆ 180 tih đôlar ah sơnăm 2022. Lơ̆m 15 sơnăm, Trung Quốc asong tơ̆ Việt Nam tŏk hloh 10 'măng đơ̆ng 2 tih đôlar ah sơnăm 2008 dang ei tŏk truh 25 tih đôlar. Anih hơdah hloh lơ̆m tơbôl Việt Nam-Trung Quốc noh tơroh kon pơlei păng jang hadoi kơ dôm tơring. Truh dang ei, hlôi đei jê̆ 60 dêh char, pơlei tơm kơ Việt Nam iung jang tơbôl hăm dôm tơring kơ teh đak Trung Quốc. Lơ̆m 10 khei sơnăm âu, Việt Nam sơng 1,3 trĭu tơmoi đơ̆ng Trung Quốc. Tơdrong jang hadoi đơ̆ng Việt Nam - Trung Quốc lơ̆m dôm tơdrong jang atŭm kơ tơring păng lơ̆m apŭng plenh teh hơnơ̆ng đei hơtŏk pran.