Pơgê năr 16/6, tơ̆ Anih jang Trung ương Đảng, ƀok Tổng Bí thư Nguyễn Phú Trọng pơgơ̆r tơdrong hop akŏm Anih tơm Chĭnh trĭ, Ƀan Ƀĭ thư tơgop nơ̆r găh Tơdrong pơtôch 20 xơnăm pơm kiơ̆ Tơchơ̆t kơsô̆ 23-NQ/TW, năr 12/3/2003 đơ̆ng Ƀan châ̆p hanh Trung ương Đảng jăl 9 găh iŏk yua jơhngơ̆m pran tơguăt tơguăl tôm kon pơlei, kơyuơ kon pơlei pơdrŏng, teh đak pran kơtang, tơpôl hơtŏ hơnơ̆ng, rơngei hiôk hian, gơh rơgei. Đơ̆ng rŏng kơ mơ̆ng Anih juăt jang kơ Jơnŭm pơgơ̆r chih akŏm Tơdrong jang tơroi tơbang, Anih tơm Chĭnh trĭ hlôi pơma đam, drơ̆ng nơ̆r xơkơ̆t hơdăh: Lơ̆m dôm xơnăm kơ âu, jơhngơ̆m pran tơguăt tơguăl tôm kon pơlei hơnơ̆ng đei hơmet hơtŏk păng iŏk yua tơnăp vă hơtŏk jang mŭk drăm – tơpôl, vei xơđơ̆ng tơpôl teh đak, jang tơbôl, tơrĕk ăn tơdrong hơrih kon pơlei; hơmet đon lui đơ̆ng kon pơlei hăm Đảng, Jơnŭm pơgơ̆r teh đak. Tơdrong jang hơmet pơ-'lơ̆ng Đảng păng anih jang chĭnh trĭ đei lăng tơgĭt. Lơ̆m hop akŏm, Anih tơm Chĭnh trĭ adoi xơkơ̆t hơdăh: Tơguăt tơguăl kon pơlei jing tơdrong juăt jue kăp gĭt, jing trong jang tơm đơ̆ng Đảng, jing tơdrong tơm tơchơ̆t rim tơdrong đei jơnei lơ̆m tơdrong jang tơ-iung pơjing păng vei lăng teh đak. Tơguăt tơguăl tôm kon pơlei kiơ̆ trong jang xăh hô̆i chuh nghia, tơgĭt xơnong pơm tơm kơ kon bơngai, xơnong pơyua ăn kon pơlei, pơm kiơ̆ xơnong pơm tơm kơ kon pơlei.