Tơ̆ Anih jang Trung ương Đảng, Ƀok Tổng Bí thư Nguyễn Phú Trọng hlôi pơma đam hăm Kơdră Đảng Teh đak Nga Thŏng nhâ̆t, Phŏ Kơdră Jơnŭm jang vei xơđơ̆ng tơpôl Liên ƀang Nga Dmitry Medvedev tŏk bŏk oei tơmang teh đak Việt Nam đơ̆ng năr 21 truh năr 23/5/2023 kiơ̆ Tơchơ̆t pơdrơ̆ng jang hadoi đơ̆ng Đảng Cộng sản Việt Nam păng Đảng “Teh đak Nga Thŏng nhâ̆t”.

Tơ̆ jơ pơma đam, ƀar ƀok kơdră chơt hơ-iă găh tơdrong tơbôl juăt jue 'lơ̆ng rŏ păng jang hadoi tôm tơdrong đơ̆ng 2 teh đak păng tơdrong jang tơbôl kơhret kơ 2 Đảng kiơ̆ tơdrong lui ngeh kơjung hloh găh chĭnh trĭ, tơƀôh kiơ̆ đơ̆ng dôm tơdrong pơma đam kơpal kơ 2 teh đak, 2 Đảng. Ră hơdăh Việt Nam hơnơ̆ng lăng tơgĭt tơdrong tơgŭm kăp gĭt đơ̆ng kon pơlei Liên Xô păng kon pơlei Nga 'nhŏng oh, ƀok Tổng Bí thư xơkơ̆t hơdăh, lơ̆m trong jang tơbôl kơ po, Việt Nam lăng tơgĭt tơdrong tơbôl juăt jue, jang hadoi tôm tơdrong hăm Nga, Đảng Cộng sản Việt Nam lăng tơgĭt tơdrong hơtŏk tơbôl hăm dôm đảng dơnơm tơ̆ Nga, lơ̆m noh đei Đảng “Teh đak Nga Thŏng nhâ̆t”, pơm tơdrong tơm jang chĭnh trĭ ăn tơbôl đunh đai păng kơjăp xơđơ̆ng kơ 2 teh đak.