Pơma dơnuh hăm đe drăkăn jang Tang măt ăn Kuôk hô̆i, Ƀok Tổng Bí thư Nguyễn Phú Trọng ră hơdăh, tơdrong jang tơplih 'nao, jang kiơ̆ trong pơm jang 'nao, tơ-iung păng vei lăng teh đak lơ̆m khei năr hle tŏk bŏk oei tơlĕch lơ tơdrong pơkăl kăp gĭt hăm tôm anih jang Đảng, tôm kon pơlei, tôm anih jang chĭnh trĭ kơ teh đak bơ̆n, lơ̆m noh đei xơnong jang tih tên đơ̆ng Kuôk hô̆i, đơ̆ng rim bơngai jang tang măt ăn Kuôk hô̆i, đe drăkăn jang tang măt Kuôk hô̆i. Kiơ̆ tơchơ̆t âu, Ƀok Tổng Bí thư Nguyễn Phú Trọng tơbăt, khei năr truh, đe drăkăn jang tang măt ăn Kuôk hô̆i kăl pơtoi chĕp vei tơdrong juăt jue nuih mơng kơ đe drăkăn Việt Nam, dăp đon dăp bơnôh pơm jang kơyuơ tơdrong pơyua ăn teh đak, ăn kon pơlei, kơyuơ tơdrong hơrih jơnap ăn kon pơlei; jang tơnăp hloh xơnong jang kơ bơngai tang măt ăn kon pơlei; chĕp vei xơnong jang tơnăp lơ̆m chih akŏm khôi luơ̆t (lơ̆m noh đei khôi luơ̆t tơchơ̆t găh hơtŏ hơnơ̆ng drănglo drăkăn), hơlen tơnăp păng tơchơ̆t dôm tơdrong kăp gĭt kơ teh đak lơ̆m tơdrong jang kơ Kuôk hô̆i.