Ƀok Tổng Bí thư Nguyễn Phú Trọng lui ngeh 'măng năm tơmang gô pơm gru kơnăl hơtŏk tơbôl kơ 2 teh đak pơtoi 'lơ̆ng rŏ, kơjăp păng pơyua hloh lơ̆m khei năr truh. Ƀok Tổng Bí thư ră hơdăh, tơbôl kơ 2 teh đak hlôi ƀơm tơnap tap lơ̆m khei năr âu ki păng hơpơi 'meh roi năr roi hơtŏk 'lơ̆ng hloh, kơyuơ tơdrong pơyua kơ kon pơlei 2 teh đak.

Ƀok kơdră teh đak Hàn Quốc pơkăl 2 păh tơrĕk pơtho pơhrăm bơngai mơlôh 2 teh đak; Hàn Quốc gô pơtoi pơtho pơhrăm ăn sinh viên Việt Nam, pơm trong hiôk vă sinh viên Việt Nam gơh mơ̆t hŏk tơ̆ dôm hnam trưng gơh rơgei kơ Hàn Quốc, pơm gơng tơroh kơjăp ăn tơdrong tơbôl jang hadoi kơ 2 teh đak; pơkăl 2 păh hơtŏk akŏm kon pơlei, drŭt kơtang jang hadoi găh pơtho pơhrăm, khua hŏk kŏng ngê̆, hơtŏk tơdrong tơbôl Hàn Quốc - Việt Nam jing um ai tơnăp lơ̆m jang tơbôl lơ̆m apŭng plenh teh, 2 teh đak atŭm hơdrin kơyuơ tơdrong rơngei, jang hadoi păng xơnêp xơnoi.