Ƀok Tổng Bí thư Tô Lâm sơkơ̆t hơdah dơ̆ng trong jang drơ̆ng minh đơ̆ng Đảng, Jơnŭm pơgơ̆r teh đak păng kon pơlei Việt Nam lăng tơgĭt păng khŏm mă jang tôm tơdrong vă atŭm hăm Đảng, Jơnŭm pơgơ̆r păng kon pơlei teh đak Cuba hơnơ̆ng pơih să păng kơhret hloh dơ̆ng tơdrong tơguăt tơguăl juăt jue, tơbôl kăp gĭt păng jang hadoi tôm tơdrong Việt Nam - Cuba, kơyuơ tơdrong pơyua kơ kon pơlei 2 teh đak, kơyuơ tơdrong jang pơjing chu nghĩa xah hô̆i păng kơyuơ tơdrong rơngei hiôk hian sơđơ̆ng, jang hadoi păng hơtŏk tơ-iung lơ̆m apŭng plenh teh.

Ƀok Tổng Bí thư Tô Lâm tơƀlŏk dơ̆ng dôm tơdrong jang đei jơnei kăp gĭt lơ̆m 'măng mă Ƀok Tổng Bí thư năm tơmang truh teh đak Cuba, ră hơdah truh tơdrong jang drơ̆ng minh đơ̆ng Kơdră 2 Đảng, 2 teh đak lơ̆m dôm tơchơ̆t tơlĕch jang hadoi gah choh jang xa, jang unh hơyuh, tĕch pơdro, jang kŏng ngê̆ sinh hŏk, atŭm hăm noh hơtŏk pran jang hadoi kơjăp lơ̆m dôm tơdrong vei sơđơ̆ng tơpôl, jang tơbôl păng dôm tơdrong hơpeh hơpong jang hadoi kơ dôm anih jang păng kon pơlei 2 teh đak.