Tơ̆ Hop akŏm tih G20, Khul tang măt ăn Việt Nam vang akŏm lơ̆m rim tơdrong jang tơ̆ Hop akŏm. Thủ tướng teh đak đei 2 ƀai iung pơma gĭt kăl tơ̆ dôm ‘măng pơma nuh găh Tơdrong jang “Tang găn pơngot, tơnuh hin” păng “Jang tŏk pran kơjăp hăm tơplih unh hơyuh” kŭm hăm 35 ‘măng tơƀâp 2 pang hăm lơ kơdră chĕp kơ̆l dôm teh đak, dôm anih jang lơ̆m apŭng plenh teh vang truh Hop akŏm.

Dôm tơdrong jang tôch ‘lơ̆ng, đei yoa đơ̆ng Thủ tướng teh đak hlôi tơƀôh hơdăh um rup teh đak Việt Nam hơbĕch hơbal, chơt rơhău, “jĭ boăl juăt, jĭ teh đak jang hơdoi tôch sơđơ̆ng păng teh đak jang tôch tơnăp lơ̆m tơpôl apŭng plenh teh”. Lơ̆m ‘măng năm tơmang lăng tơ̆ teh đak Dominicana, Thủ tướng Phạm Minh Chính đei jơ pơma đam gĭt kăl, tôch đei yoa hăm Kơdră tơm Luis Abinader Corona, kiơ̆ kơ ‘nŏh 2 păh drơ̆ng nơ̆r ăn tơdrong tơchơ̆t atŭm, tơƀôh đon hơdăh đon pơhnŏng đơ̆ng Khul kơdră 2 teh đak păng roi tơbăt dôm trong vă jang đei 2 păh drơ̆ng nơ̆r vă hơtŏk hlŏh dơ̆ng tơdrong pơvei mât 1 ƀơ̆r đon, pơm boăl juăt păng jang hơdoi ‘lơ̆ng hơiă đơ̆ng Việt Nam păng Dominicana tơ̆ hơnăp kơnh.