Tơ̆ hop akŏm, rim kơdră tang măt hôn bơnê rim ƀai chih vang năm pơlong đei chih tơlĕch ‘lơ̆ng, trŏ lăp.

Rim ƀai chih hlôi chih trŏ lăp hăm rim tơdrong tơchơ̆t kơ Tơmam hơpăh chih kơtơ̆ng ang Diên Hồng ‘măng mă blŭng, chih tơbăt hơdăh dôm tơdrong hơrih sa, mă kăl pơm hơdăh hloh dơ̆ng hơnih dơ̆ng, hơnbăp jang, sơnong jang đơ̆ng Kuô̆k hô̆i, Jơnŭm vei lăng kon pơlei, rim kơdră tang măt ăn kon pơlei, đei lang să ‘lơ̆ng lơ̆m pơlei pơla. Kơ iĕng Kơdră chĕp pơgơ̆r Kuôk hô̆i Trần Thanh Mẫn pơma hơdăh, Tơmam hơpăh Chih kơtơ̆ng ang Diên Hồng ‘noh tơdrong pơgơ̆r vă pôk pơ ư dôm bơngai bơ̆ jang chih kơtơ̆ng ang găh tơdrong jang tang măt kon pơlei, hơnih bơ̆ jang tang măt kon pơlei; athei hơmet pơ ‘lơ̆ng dôm tơdrong tim mă trŏ lăp lơ̆m ‘măng pơgơ̆r blŭng a, hơnơ̆ng sơđơ̆ng tơlĕch jơnei kơ pơgơ̆r pơlong Tơmam hơpăh Diên Hồng ‘măng mă 2. Lơ̆m au, hơmet ming, tơmơ̆t dơ̆ng trong pơkăp Tơmam hơpăh Diên hồng ‘măng mă 2 vă hơvơn đei lơ ƀai chih vang năm pơlong hloh dơ̆ng.