-Ƀok Vôt ăi! Blŭng a, inh đei nơ̆r hơiă hăm ih ‘nao đei năm tơ̆ Hà Nội vang truh Hop akŏm, pôk pơ ư bơngai rơgei ‘nŏh jĭ đe kră pơlei đei kon pơlei tơ̆ tơring kon kông lui yom lơ̆m teh đak!

            -Kră pơlei Vôt: “Inh tôch hơiă đei năm tơ̆ Hà Nội, inh ƀôh Hà Nội tơplih tôch ‘lơ̆ng, ưh kơ đei pha kiơ kơ teh đak đe, hnam tơ̆ng, cham gre păr ‘lơ̆ng dêh! ‘Măng mă blŭng inh năm tơ̆ Hà Nội tơpă mơ̆n rim tơdrong tơplih ‘lơ̆ng dêh. Đei truh hop akŏm hăm bơngai tang măt ăn dôm hơdrĕch kon kông, đei tơƀâp, pơma nuh, chă ngôi tơ̆ lơ anih... Inh ƀôh tôch lăp đon mưh ƀôh tơdrong tơplih ‘lơ̆ng rŏ âu”.

-Chơt hơiă jĭ bơngai tang măt đơ̆ng dêh char Gia Lai đei truh hop akŏm lơ̆m teh đak păng lăng ƀôh Anih tơm Hà Nội pơdrŏng ‘lơ̆ng rŏ, lei bĭ tơ̆ tơring ih ƀôh thoi yơ?

            -Kră pơlei Vôt: “Kơtă tơ̆ Pleiku dang ei kŭm tơplih tôch ‘lơ̆ng bơih. Tơdrong arih xa roi tŏk, kon pơlei băt vei lăng jơhngâm pran, rim pơgê, rim kơsơ̆ pơtâp ƀât Cham xă Rup man Ƀok Hô ƀât tŏk bŏk plt. Nhôn năm hôp tơ̆ noh, tơ̆ kơsơ̆ chă ngôi ƀôh tơdrong arih xa tơplih ‘nao ‘lơ̆ng rŏ, hơiă dêh!”

-Jĭ kră pơlei đei kon pơlei lui yom vang năm Hôp lơ̆m teh đak, năm lăng tơ̆ lơ tơring, ih roi tơbăt tơdrong 'nâu hăm kon pơlei thoi yơ hă kră pơlei?

            -Kră pơlei Vôt: “Rim ‘măng năm Hop akŏm âu to tơ̆ dêh char, tơ̆ Trung ương dăh mă năm tơ̆ Hà Nội mưh vih hăm pơlei, đei hŏk iŏk lơ nơ̆r pơtho tơƀôh, lơ̆m dôm ‘măng hŏk hôp pơlei pơla inh hơnơ̆ng tơroi tơbăt, pơlung kon pơlei adrin choh jang xa, pơtăm chĕh phe, jang ƀa đak, adrin săy phŏng, vei rong mă ‘lơ̆ng vă tưk tơiung mŭk drăm, yoa đe hơnơ̆ng pơma “Kon pơlei pơdrŏng ‘mơ̆i teh đak gơh pran”. Hăm plei nhôn hrei ‘nâu, bu bu kŭm adrin choh jang xa, vă rim unh hnam đei pơtăm chĕh phe ngăl...”

-Kiơ̆ ih, dôm tơdrong tơplih kiơ pơm ăn ih ƀôh lăp đon hlŏh lơ̆m tơdrong arih xa kơ kon pơlei hrei ‘nâu?

           -Kră pơlei Vôt: “Tơdrong arih xa hrei ‘nâu pơting hăm adrol sơ̆ tơplih pha tơpă. Unh hnam đei ƀôh roi lơ, năng atŭm lơ̆m plei nhôn tŏk roi ‘lơ̆ng ƀiơ̆, rim hnam jang ƀa đak 2 pơyan, pơtăm chĕh phe, tiu... Hơdrô̆ unh hnam tơnuh, vă jê̆ tơnuh ‘nŏh đei Đảng, teh đak tơgŭm man hnam, mơh ma duch nă adrin jang xa kơ na unh hnam tơnuh lăp oei đei pă 4 unh hnam, vă jê̆ tơnuh pă 17 unh hnam. Tơdrong kăl hlŏh dơ̆ng dôm unh hnam tơnuh đei đon adrin jang tŏk tôch ‘lơ̆ng, kŭm hăm tơdrong tơgŭm đơ̆ng teh đak lơ unh hnam kŭm chă tŏk jên vă man dơ̆ng hnam kơjăp ‘lơ̆ng, vă jang xa, rong kon hơ ‘lơ̆p năm hŏk…”

- Ih ‘nao pơma truh tơdrong rong kon hơ ‘lơ̆p năm hŏk tơ̆ pơlei, mă hơdăh tơdrong ‘nâu thoi yơ hă?

            -Kră pơlei Vôt: “Tơdrong tơplih dơ̆ng ‘nŏh đe hơioh, oh mon hrei ‘nâu năm hŏk ngăl. Lơ̆m pơlei nhôn bơ̆n kră hơnơ̆ng hơnơ̆ng chông ba kon hơ ‘lơ̆p năm hŏk, tôm sơnăm ‘nŏh năm hŏk mâu yăo, mĕ ƀă năm ba rim năr, truh hloi đe kon oh năm hŏk tơ̆ xăh đei mĕ ba chông ba ‘năi, ưh ăp đei pră hơchăng nhen sơ̆ bơih. Dang ei lơ̆m pơlei kŭm đei 2,3 mon hŏk đăi hŏk bơih!”

-Tơpă mơ̆n, tơdrong tơplih tơ̆ plei Brêp, hơdai hăm tơdrong tơgŭm đơ̆ng Đảng păng teh đak, đei hloi lơ tơdrong tơgop đơ̆ng kră pơlei. Mât lơ̆m sơnăm ‘nao 2025, ih vă hơnơ̆ng bơ̆ jang hơnăp jang đơ̆ng kră pơlei thoi yơ?

            -Kră pơlei Vôt: “Tơ̆ hơnăp kơnh, jô̆ hloi găh tơdrong jang mŭk drăm, inh vă hơnơ̆ng roi tơƀôh, krao hơvơn kon pơlei mât 1 ƀơ̆r đon, adrin jang xa. Inh vă pơjing Khul pơtăm chĕh phe hơdai ăn pơlei vă mong jên tưk tơiung pơlei, vă pơlei pơla roi đunh roi pơdrŏng ƀiơ̆. Inh hơnơ̆ng chă krao hơvơn kon pơlei adrin rong kon năm hŏk truh tôch, inh kŭm tơtă ăn đe mĕ ƀă mă dôm unh hnam tơnuh thoi ei ‘năi mơ̆n”.

-Kră pơlei ăi, kơplăh dang ei, jơ̆p pơlei pơla tơ̆ Tây Nguyên păng lơ̆m teh đak oei pơgơ̆r xa Têt tôch chơt hơiă ‘nă hal, bĭ Têt tơ̆ plei Brêp bơ̆n pơgơ̆r thoi yơ?

              -Kră pơlei Vôt: “Têt lơ̆m pơlei ‘nŏh mih ma duch nă pơgơ̆r têt hơdai. Kŭm hăm tơdrong tơgŭm đơ̆ng teh đak, mih ma duch nă vang tơra tơgop bơ̆n jên, tơmam hai vă pơgơ̆r ngôi pơchơt hơdai, chă pơma nuh, pơlung băl jang xa. Têt truh, inh apinh hmach thơ thou ăn mih ma duch nă ling lang pran jăng grămg akâu, hiôk chơt. ”

-Ĭ ah, bơnê kơ ih kră pơlei! Thơ thou ăn ih sơnăm ‘nao liĕm kâu, hiôk hian!