(Hà Nội, năr 28 khei 01 sơnăm 2025)

Ơ mih ma duch nă kon pơlei pơla, kang ƀô̆ păng ƀô̆ đô̆i kŏng ang lơ̆m teh đak păng kon pơlei oei tơ̆ teh đak đe!!

Mĭnh puih mak ‘nao-Puih mak Ất Tỵ hlôi truh hơnhăk ba dôm tơdrong chơt hơ iă, hơmŏ păng hơpơi ‘meh vă ‘lơ̆ng liĕm. Lơ̆m jơ ‘năr tơƀưh gĭt kăl kơ sơnăm ‘nao, tang măt ăn kơdră chĕp pơgơ̆r Đảng, Teh đak, Ĭnh apĭnh pơtruh nơ̆r ƀơ̆r pơma hăm đĭ đăng kon pơlei pơla, kang ƀô̆, ƀô̆ đô̆i kŏng ang lơ̆m teh đak păng kon pơlei bơ̆n oei tơ̆ teh đak đe sơnăm ‘nao linglang pran jăng grăng akou. Ĭnh jei apĭnh pơtruh nơ̆r hăm bôl boăl, kon pơlei rim teh đak lơ̆m apŭng plĕnh teh sơnăm ‘nao rơngei hiôk hian, hơnŭk hơnoa, tơgoăt tơgoăl păng atŏk tơ iung.

Sơnăm ou ki, bơ̆n hlôi yak hloh lơ “tơdrong mơmat hrat hrĭn”, ma wlei jei jing sơnăm iŏk đei lơ tơdrong jơnei ‘lơ̆ng hơ iă. Lơ̆m mơmat tat, tơdrong long, jơhngơ̆m đon tơgoăt tơgoăl, ‘mêm mơnat dih băl păng jơhngơ̆m đon hơdrin atok tơ iung đơ̆ng hơdrĕch hơdrung bơ̆n sa roi sơkơ̆t hơdăh pran kơtang hloh dơ̆ng. Pơđĭ lơ̆m đảng, lơ̆m kon pơlei, lơ̆m ƀô̆ đô̆i kŏng ang bơ̆n hlôi kơrŭn kơtang iŏk đei păng jơnei hloh đĭ đăng 15/15 trong tơlĕch jang atŏk tơ iung mŭk drăm-tơpôl, hơyak tok tơiung muk drăm găh khul dơ̆ng hơlou lơ̆m apŭng plĕnh teh; tơdrong hơrih sa mŭk drăm kơ Kon pơlei hơnơ̆ng đei hơmet pơ ‘lơ̆ng păng atŏk tơ iung; chinh trĭ-tơpôl sơđơ̆ng, vei lăng sơđơ̆ng teh đak păng sơđơ̆ng dơ̆ng kơjăp đei atŏk kơtang, tơbôl hăm teh đak đe pơih să, đei bôl boăl apŭng plĕnh teh lui yom, hôn bơnê kơtang. Rim ‘nu kon pơlei Việt Nam, oei lơ̆m teh đak dăh mă oei tơ̆ teh đak đe, đơ̆ng kŏng nhân, kon pơlei choh jang sa, bơngai mơdro sa, bơngai hŏk jrŭ truh hăm rim ƀô̆ đô̆i kŏng ang bơ̆ jang tơ̆ tơring sơlam teh đak, achon dơsĭ hơtăih yăih jei gơh hưch hanh hơmanh bơnê găh dôm tơdrong tơgop lơ̆m iŏk đei jơnei atŭm kơ Teh đak.

Sơnăm 2025, ‘noh sơnăm ƀĕnh ƀang tơdrong pơgơ̆r gĭt kăl kơ teh đak, sơnăm “atŏk kơtang hloh”, pơjing đei hơyak gĭt kăl ba teh đak mơ̆t lơ̆m chăl hle-chăl atŏk tơ iung pơdrŏng pran kơtang păng hơnŭk hơnoa; nơ̆r Đảng mơ̆t hlom lơ̆m jơhngơ̆m đon Kon pơlei găh trong tơlĕch jang hơnŭk hơnoa kơ hơdrĕch hơdrung. Mă đơ̆ng oei đei lơ tơdrong tơnap tap, tơdrong long, mălei Việt Nam gô yak hơyoh tơ̆ hơnăp, ưh kơ đei yă kiơ tang găn kĕ tơdrong hơpơi ‘meh vă atŏk tơ iung păng tơ̆ hơnăp ‘lơ̆ng rŏ hơbŏ nhen kơ Hơdrĕch hơdrung bơ̆n. Pơđĭ lơ̆m Đảng, kon pơlei, ƀô̆ đô̆i kŏng ang hơnơ̆ng tơgoăt tơgoăl pôm nơ̆r ƀơ̆r đon, mĭnh jơhngơ̆m, mĭnh đon, atŏk kơtang jơhngơ̆m đon iung jang, lui tơ̆ hơnăp, hưch hanh hơmanh bơnê hơdrĕch hơdrung, tơgĕch dôm tơdrong rơvơn, yak hloh tơdrong tơnap tap, tơdrong long vă atŏk tơ iung kơtang, tơ iung pơjing teh đak Việt Nam kon pơlei pơdrŏng, teh đak pran kơtang, pơm tơm kơdih, hơtŏ hơnơ̆ng, gơh hơgei; rim răih kon pơlei jei đei tơdrong hơrih sa phĭ tơtŏ dơnŏ ‘lơ̆ng, hiôk jơnap, hơnuk hơnoa; tơgop roi năr roi lơ ăn rơngei hiôk hian, sơđơ̆ng, atok tơ iung kơ tơring păng apŭng plĕnh teh.

Lơ̆m jơ ‘năr tơƀưh ‘lơ̆ng liĕm păng gĭt kăl kơ plenh teh, chhưu lơ̆m jơhngơ̆m đon, hưch hanh hơmanh bơnê sơng puih mak ‘nao, mĭnh ‘măng dơ̆ng Ĭnh apĭnh pơtruh nơ̆r hmach thơ thou ăn đĭ đăng kon pơlei pơla, kang ƀô̆, ƀô̆ đô̆i kŏng ang lơ̆m teh đak păng kon pơlei bơ̆n oei tơ̆ teh đak đe mĭnh sơnăm ‘nao linglang pran jăng grăng akou, hơnŭk hơnoa. Sơnăm ‘nao ưh kơ jor gô iŏk đei lơ tơdrong jơ nei ‘nao.

Bơnê lơ!