Đơ̆ng dôm năr blung sơnăm ‘nao hloi, khul ƀô̆ đô̆i Kơđông ƀô̆ đô̆i vei lăng sơlam teh đak dêh char Gia Lai tơlĕch tơdrong jang “Puih mak Ƀô̆ đô̆i vei lăng sơlam teh đak sơđơ̆ng jơhngơ̆m kon pơlei” đei pơgơ̆r hloi tơ̆ rim tơring sơlam teh đak kơ rim apŭng Ia Grai, Đức Cơ, Chư Prông, dêh char Gia Lai. Tơdrong pơgơ̆r jing jơ ‘năr vă rim ƀô̆ đô̆i Kơđông ƀô̆ đô̆i vei lăng sơlam teh đak lơ̆m tơring atŭm hăm kon pơlei tơring vang chă ‘nŭng ƀĕng chư̆ng, pơgơ̆r tôn chĭng chêng, joh hơri pơma dơnuh tơgoăt kơjăp jơhngơ̆m đon ‘mêm kơ eng dih băl ƀô̆ đô̆i-kon pơlei. Dôm bơngai đei jơhngơ̆m đon ‘lơ̆ng pơgơ̆r hơdrơ̆r tơmam drăm 0 hlak jên, đơ̆ng noh pôk ăn kon pơlei kơhrĕng tơmam drăm ‘noh đei khăn buk, kơmŭng, phe ... pơgơ̆r khăm jĭ, ƀơk pơgang ăn kon pơlei.

Kră pơlei Rơ Chăm Trom, 84 sơnăm oei tơ̆ pơlei Bua, tơring Ia Pnôn, apŭng Đức Cơ tơbăt, kon pơlei đei kang ƀô̆ Ƀô̆ đô̆i vei lăng sơlam teh đak tơgŭm djru tôch kơ lơ lơ̆m hơrih sa, jang sa, pơtho kon pơlei choh jang sa, rong kon tơrong, pơm hnam kơjăp ‘lơ̆ng ... Têt truh Puih mak vih, Ƀô đô̆i vei lăng sơlam teh đak oei pơgơ̆r chă khăm ming hơmet jĭ jăn păng ƀơk pơgang ăn ŭnh hnam đei iŏk yua ăn teh đak, ŭnh hnam dơnuh pơm ăn kơ ƀok chơt hơ iă ‘nă hal.“Hăm hơnăp jang kơ minh ‘nu kră pơlei, tơdrong jang kơ ba ‘noh pơrô̆ pơrôp kon pơlei, ba ƀôh kon pơlei jei chơt hơ iă ‘nă hal mưh kơtơ̆ng đei ƀô̆ đô̆i vei lăng teh đak năm ngôi, pôk ăn tơmam drăm, oei chă khăm ming hơmet jĭ jăn, ƀơk ăn pơgang dơ̆ng. Đơ̆ng dôm trong jang ‘lơ̆ng hơ iă ou jei hlôi pơjing đei jơhngơ̆m đon kon pơlei lui yom kơjăp hăm ƀô̆ đô̆i vei lăng sơlam teh đak, đơ̆ng noh pơjing đei tơgoăt tơgoăl dih băl kơ ƀô̆ đô̆i hăm kon pơlei sa roi ‘lơ̆ng hơ iă hloh dơ̆ng” 

Vă sơđơ̆ng dơ̆ng kơjăp tơring sơlam teh đak, khul Ƀô̆ đô̆i vei lăng sơlam teh đak dêh char Gia Lai ling lang lăng kơjăp bơ̆ jang pơrô̆ pơrôp, pơjing đei jơhngơ̆m đon kon pơlei lui yom kơjăp. Hăm trong jang “pêng tơklep, puăn vang atŭm” (tơklep hăm tơring, tơklep hăm kon pơlei, tơklep kơjăp hăm dôm tơdrong; vang oei sa hơdoi, vang jang, vang pơma nơ̆r kon kông), khul Ƀô̆ đô̆i vei lăng sơlam teh đak dêh char Gia Lai ling lang yak hơdoi hăm kon pơlei tơplih jơhngơ̆m đon tơchĕng, trong jang sa lơ̆m choh jang sa, tơ iung pơjing hơrih sa ‘lơ̆ng hơ iă, xut hŭt dôm tơdrong joăt joe sơ̆ ki pă trŏ lăp. Dôm năr blŭng Puih mak 2025, dôm tơdrong pơgơ̆r ‘lơ̆ng hơ iă kơ yuơ Ƀô̆ đô̆i vei lăng sơlam Teh đak tơlĕch tơgŭm ăn tơdrong hơrih sa kơ kon pơlei sa roi ‘lơ̆ng hơ iă hloh dơ̆ng, kon pơlei chơt hơ iă ‘nă hal, lui yom kơjăp, atŭm hăm ƀô̆ đô̆i vei lăng năng tông sơlam teh đak. Đại tá Nguyễn Văn Nghị, Kơ iĕng Kơdră chĕp pơgơ̆r jang Đảng Hơnih chĕp pơgơ̆r Ƀô̆ đô̆i vei lăng sơlam teh đak dêh char Gia Lai tơbăt.“Puih mak vih Têt truh, Ƀô̆ đô̆i vei lăng sơlam teh đak dêh char Gia Lai pơgơ̆r krao hơvơn rim hơnih jang đei jơhngơ̆m đon ‘lơ̆ng hơ iă vang iung jang kơrŭn jơhngơ̆m vă ưh kơ lê̆ đei bơngai bu hơchăng hŭt tơ̆ rŏng, vă rim răih kon pơlei oei tơ̆ tơring sơlam teh đak đei sa têt ngăl. ‘Nou jĭ jơhngơ̆m đon ‘mêm kơ eng dih băl, mơnat dih băl, tơdrong lăng ba đơ̆ng Ƀô̆ đô̆i vei lăng sơlam teh đak hăm kon pơlei oei tơ̆ tơring sơlam teh đak, mă kăl ‘noh dôm kon pơlei dơnuh đei tơdrong hơrih sa phĭ tơtŏ dơnŏ ‘lơ̆ng vă vang iung jang hơdoi hăm kon pơlei lơ̆m teh đak, atŭm hăm ƀô̆ đô̆i vei lăng sơlam teh đak iung jang vei lăng năng tông kơjăp iăp kơtang tơdrong pơm tơm vei lăng sơđơ̆ng teh đak lơ̆m chăl hle”

Trung tá  Đỗ Như Kiên, Kơdră chĕp pơgơ̆r Kơđông ƀô̆ đô̆i vei lăng ‘măng sơlam apŭng plĕnh teh Lệ Thanh tơbăt: sơnăm ayơ jei lei lăi, mưh truh jơ ‘năr Têt ‘noh ‘nhŏng oh kang ƀô̆ ƀô̆ đô̆i lơ̆m Kơđông ƀô̆ đô̆i vei lăng sơlam teh đak iung jang hơdoi hloi hăm kơdră tơring hơmet têt ăn kon pơlei mă hơnih oei, mă kăl hăm dôm ŭnh hnam tơnap tap, vă rim răih kon pơlei đei sơng Têt phĭ tơtŏ dơnŏ ‘lơ̆ng, tôm tong. ‘Ngoăih kơ ‘noh oei ưh kơ hiơt tơdrong jang vei lăng năng tông sơđơ̆ng tơring sơlam teh đak, vei kơjăp sơđơ̆ng gak vei lăng sơđơ̆ng prăt jơ ‘năr Têt.“Hơnĭh tơlĕch jang kơtang rim ‘măng năm pơtrui, vei lăng sơlam teh đak vă vei kơjăp tơdrong pơm tơm groi teh sơlam teh đak, adoi iung jang hơdoi tơnăp hăm rim khul nhen kŏng ang, khul ƀô̆ đô̆i vă vei kơjăp sơđơ̆ng chinh trĭ tơpôl lơ̆m tơring đei pơjao vei lăng. Iung jang tơchă băt dôm tơdrong ou to lơ̆m tơring, păh to sơlam teh đak vă tơtom băt hơdăh, hơlen pơnhên dôm tơdrong vă đei trong pơchoh trong ăn Khul kơdră Đảng, khul kơdră chĕp pơgơ̆r Kơđông adoi nhen Khul kơdră Đảng Hơnih chĕp pơgơ̆r Ƀô̆ đô̆i vei lăng sơlam teh đak dêh char Gia Lai.”

Dôm tơdrong jang gĭt kăl, ‘lơ̆ng hơ iă lơ̆m khei ‘năr Puih mak 2025 ưh khan lăp ba ăn đei tơdrong chơt hơ iă ‘nă hal ăn kon pơlei rim hơdrung tơring sơlam teh đak dêh char Gia Lai mă oei tơgop tơ iung pơjing đei tơdrong lui yom đơ̆ng kon pơlei kơjăp iăp kơtang, pơjing đei hơyak kăl ăn tơdrong jang vei lăng năng tông kơjăp iăp kơtang tơring sơlam kơ teh đak. Đơ̆ng noh, sa roi sơkơ̆t hơdăh hloh dơ̆ng hơnăp jang păng sơnong jang kơ khul Ƀô̆ đô̆i vei lăng sơlam teh đak lơ̆m vei lăng năng tông păng tơ iung pơjing tơdrong hơrih sa sơđơ̆ng dơ̆ng kơjăp, hiôk hian tơ̆ tơring sơlam teh đak.