Ƀok Y Luyện Niê Kdăm, kơdră tang măt Kuô̆k hô̆i jăl X, sơ̆ jang Ƀĭ thư Đảng dêh char Dak Lăk tơbăt, jĭ bơngai hlôi đei lơ tơdrong tơplih ‘nao kơtang, dôm tơdrong jang đơ̆ng Tổng Bí thư Nguyễn Phú Trọng ling lang đei kon pơlei lui, kon pơlei ‘mêm kơ eng, kon pơlei hôn bơnê. “Ƀok hiong ‘noh jĭ tơdrong hiong răm kơ mĭnh ‘nu kon gơ̆h hơgei kơ Đảng, kơ Teh đak kơ kon pơlei. Ƀok Tổng Bí thư hlôi năm ngôi hăm dêh char Dak Lăk, jĭ bơngai lăng ba kơtang truh kon kông, tơdrong hơrih sa tơpôl, tơdrong oei sa kơ kon pơlei, jĭ tơdrong lăng ba tơnăp tơpă mơ̆n”. 

 Pŭn ai păng hưch hanh hơmanh bơnê mưh 2 ‘măng đei tơƀơ̆p păng phĭn hơdoi hăm Tổng Bí thư Nguyễn Phú Trọng tơ̆ rim ‘măng pơgơ̆r kơ Jơnŭm rim khul joh ayŏ kơdŏ soang Việt Nam, ƀok Nguyễn Hồng Chiến, oei tơ̆ phương Tân Thành, pơlei tơm Buôn Ma Thuột, dêh char Dak Lăk, hôn bơnê kơtang găh jơhngơ̆m đon phăl hơlăng kơ minh ‘nu kơdră chĕp pơgơ̆r tơm dơnơm chă pơma sa phăl hơlăng, rơdơơ̆. Ƀok tơbăt, dôm nơ̆r pơma đơ̆ng Tổng Bí thư tôch kơ trŏ lăp, mơ̆t lơ̆m jơhngơ̆m đon, păng ƀok ling lang ƀlŏk hơdơ̆r: “Nơ̆r pơtho khan hơ iă hloh truh dang ei ba tơchĕng hăm bơngai chĕp ‘long chih chih tơdrong tơroi hle, bơ̆ jang kơtơ̆ng ang pơma dơdrô̆ păng kon pơlei pơma atŭm, ‘noh nơ̆r pơtho khan “Teh kơne ‘nĕ pơm ăn gŏl pơchăh. Pơm lơ liơ pơlôch đei kơne mă lei vei lăng ‘lơ̆ng gŏl pơkao. ‘Noh jĭ kăl vei kĕ tơdrong sơđơ̆ng dơ̆ng kơjăp”. Bơngai jang chĕp ‘long chih jei kăl hŏk kiơ̆ păng pơm kiơ̆ nơ̆r pơtho khan đơ̆ng Tổng Bí thư, pơm lơ liơ bơ̆n kĕ tang găn dôm tơdrong kơnê̆ mă lei kăl pơchoh trong ‘lơ̆ng ăn kon pơlei lui kơjăp hăm Đảng, chăl chĕp pơgơ̆r ‘lơ̆ng hơ iă kơ bơ̆n hrei ou”. 

Chĕp răk tơƀăk vei nơ̆r pơtho khan đơ̆ng Tổng Bí thư Nguyễn Phú Trọng tơ̆ Pơm lêh hop akŏm Kơdră tang măt lơ̆m teh đak Đoàn hơdruh tơdăm Kŏng san Hồ Chí Minh ‘măng mă XII, mŏ H’Hương Buông Krông, Bí thư Đoàn pơlei tơm Buôn Ma Thuột (dêh char Dak Lăk) iŏk ‘noh pơm hơyak pran ăn kơdih hŏk pơhrăm jang kiơ̆. Mă kăl pơm jŭk yŭk trong hơlou lơ̆m hơdrin hok pơhrăm jang kiơ̆ jơhngơ̆m đon kĕch mang; pơm jŭk yŭk trong hơlou hŏk pơhrăm, lơ̆m choh jang sa, tơchăr; pơm jŭk yŭk trong hơlou lơ̆m bơ̆ jang tơdrong jang chinh trĭ:“ ‘Noh jĭ jơhngơ̆m pran vă ba hơnơ̆ng hŏk pơhrăm păng pơm kiơ̆ jơhngơ̆m đon ‘lơ̆ng, trong jang hơ iă kơ Ƀok Hô păng kơdih ƀok Tổng Bí thư. Hŏk kiơ̆ ƀok găh tơdrong phăl hơlăng, tơpăt, tơnăp ‘lơ̆ng, jơhngơ̆m đon hơ iă, bơ̆ jang ‘lơ̆ng. Hơnơ̆ng hŏk pơhrăm hloh dơ̆ng dôm tơdrong hơ iă, ưh kơ ‘nhoen kơ tơnap, ưh tơtok kơ gleh păng hơdrin hloh dơ̆ng vă pơjing đei jơhngơ̆m đon nuih chinh trĭ kơjăp, hơnăp jang ‘lơ̆ng, jơhngơ̆m đon phăl hơlăng, tơmang lăng jrŭ hloh dơ̆ng”.