Hop akŏm iŏk đei 55 ƀai chih tơblang đơ̆ng dôm bơngai juăt jang, bơngai jang khoa hŏk păng bơngai vei lăng, Hnam hŏk Chinh trĭ Quốc gia Hồ Chí Minh, dôm anih tơchĕng hơlen, dôm hnam trưng chinh trĭ, kŭm hăm dôm khul jang chinh trĭ – tơpôl găh dêh char Gia Lai păng dôm dêh char lơ̆m tơring Tây Nguyên.

Dôm ƀai chih tơblang tơƀôh hơdăh hơnăp jang gĭt kăl đơ̆ng bơngai đei grih tih lơ̆m tơpôl, đơ̆ng chă roi tơbăt, krao hơvơn kon pơlei truh vang jang atŏk tơiung mŭk drăm, tơpôl, pơjing tơring tơrang ‘nao, hơmet kơjăp anih jang chinh trĭ tơ̆ tơring, vei kơjăp tơdrong tơguăt đĭ đăng hơdrĕch hơdrung; vei lăng ‘lơ̆ng tơdrong sơđơ̆ng teh đak păng tơdrong sơđơ̆ng lơ̆m tơpôl tơ̆ tơring. Lơ bơngai tang măt akhan, vă bơngai đei grih tih tưk tơiung đei hơnăp jang đơ̆ng kơdih, athei pơjing tơdrong ‘lơ̆ng hiôk hian vă đe sư vang bơ̆ jang lơ̆m dôm tơdrong jang chinh trĭ, tơpôl tơ̆ tơring; pơtho pơhrăm ming vă hơtŏk đon hlôh vao, gơ̆h hơgei, mă loi ‘nŏh băt trong dăr lăng, tơblang tơƀôh ăn tơpôl păng krao hơvơn kon pơlei tơ̆ tơring.