Dôm năr ‘nâu, unh hnam ƀok Kpuih Plơk kŭm hăm mih ma duch nă tơ̆ plei Vơng Chép oei hăt yoă ƀa tơ̆ kơdơ chŭn xăh Ayun. Ƀok tơroi, đunh kơ âu 3 sơnăm, đe kăn ƀô̆ đơ̆ng anih vei lăng choh jang xa apŭng, xăh năm tơ̆ rim hnam pơlung kon pơlei choh jang xa rei pơtăm ƀa 2 pơyan. Kon pơlei đei pơtho tơƀôh đơ̆ng choh hơmet tĕh, rei pơtăm, săy phŏng truh tơ̆ kăt yoă. Pơyan ƀa sơnăm ‘nâu, ƀok Kpuih Plơk kăt yoă đei 3 tân ƀa, iŏk yoa dang 30 triu hlak jên: “Adrol sơ̆ unh hnam choh jang mơ̆ng đơ̆ng đak ‘mi ngăl, ưh kơmăh vă jang ƀa, vă sŏ yoa. Đei Đảng, teh đak man dơnâu, hơbong đak Plei Keo ‘nŏh hơiă dêh. Dang ei, jang ƀa đei 2 pơyan, unh hnam sŏng xa ưh kơ đĭ, rơkăh ‘nŏh tĕch”

 Kŭm oei hăt kăt yoa ƀa tơ̆ chŭn ‘năi, ƀok Kpuih Trái – tơ̆ plei Keo, xăh Ayun, apŭng Chư Sê ưh kĕ ôn tơdrong hơiă: “Hnam nhôn đei 7 sao ƀa, ƀât tam mă đei đak ki 7 sao âu lăp kăt yoă đei 10 ƀao ƀa đĕch, gơnơm đei dơnâu đak Plei Keo, pơyan ‘nâu đei truh 25 ƀao 1 pơyan, 2 pơyan đei 50 ƀao. Adrol sơ̆ pơmat tat yoa đơ̆ng đak tôch kơdêh, dang ei đei dơnâu đak pơchoh đak jur kơna kon pơlei tôch hơiă”

Adrol ki ƀât tam mă đei dơnâu Plei Keo, lơ̆m xăh Ayun lăp đei dang 50 ha ƀa 1 pơyan păng gơnơm đơ̆ng đak ‘mi ngăl. Mă lei đơ̆ng sơnăm 2020 mưh dơnâu Plei Keo đei tơmât yoa, chŭn na ƀa đak đĭ tŏk vă truh 200 ha, gơ̆h jang 2 pơyan 1 sơnăm, plei ƀa kŭm ‘lơ̆ng, đei xa lơ ƀiơ̆. Ƀok Phạm Ngọc Tuấn – Phŏ Kơdră vei lăng kon pơlei xăh Ayun tơroi, jang ƀa đĭ dar dĕh pơm sơđơ̆ng păng hơtŏk đei tơdrong arih xa ăn kon pơlei bơih.

 “Đơ̆ng rŏng kơ đei dơnâu Plei Keo kon pơlei choh jang đơ̆ng 1 pơyan jing 2 pơyan, ƀa jang đei kŭm tŏk ƀiơ̆, đơ̆ng 35 truh 65 tă/ha. ‘Nâu jĭ tơdrong tôch hơiă đơ̆ng kon pơlei. Hơdai hăm ‘nŏh đei tơdrong tơgŭm đơ̆ng dôm anih jang kơpal tơ̆ apŭng nhen tơgŭm bơ̆n hơdrĕch ƀa ‘nao ‘lơ̆ng, pơtho ăn ki thuơ̆t jang, săy phŏng, kăt yoă ƀa, mă loi jĭ tơmât yoa kơmăy kơmŏk vă yoă ƀa kơna tôch đei yoa, hơnhak tơdrong iŏk yoa ‘lơ̆ng ăn kon pơlei”

Xăh Ayun dang ei đei 6 pơlei; kon pơlei kon kông đei hlŏh 90%. Jĭ xăh pơmat tat dêh hlŏh kơ dêh char Gia Lai, sơnăm 2016, hlŏh 75% kơsô̆ unh hnam tơ̆ Ayun tơnuh hin. Truh dang ei, tơdrong arih xa kơ kon pơlei roi đunh roi tŏk, kơsô̆ unh hnam, tơnuh tơ̆ xăh păng dang 13%. Vă gơ̆h đei thoi âu, kŭm hăm tơdrong adrin jang tŏk đơ̆ng kon pơlei, ‘nŏh jĭ tơdrong tơgŭm hrơ̆ch ‘lơ̆ng, đei yoa đơ̆ng teh đak, lơ̆m noh đei dơnâu đak Plei Keo.

Yă Rmah H'Bé Nét, Phó Bí thư chĕp kơ̆l Đảng apŭng, Kơdră vei lăng kon pơlei apŭng Chư Sê ăn tơbăt, Ayun jĭ tơring kăn kư̆ kăch mang, jĭ xăh nuih mơng lơ̆m khei ‘năr tơblăh sơ̆, hăm kơsô̆ kon pơlei kon kông đei truh 97%, mă lơ ‘nŏh jĭ bơngai Jarai. Adrol sơ̆, yoa ưh băt trong choh jang xa păng hơnơ̆ng đei tŏ phang pơđang dơ̆ng, kơna Ayun jĭ 1 lơ̆m dôm xăh tơnuh hin hlŏh kơ dêh char Gia Lai. Khei 4/2017, lơ̆m 'măng năm ngôi păng bơ̆ jang tơ̆ dêh char Gia Lai, Tổng Bí thư Nguyễn Phú Trọng tôch tơtăm hăm dôm tơdrong pơmat tat đơ̆ng kon pơlei tơ̆ Ayun. Đơ̆ng rŏng chă hơlen năng dôm nơ̆r apinh đơ̆ng kơdră chĕp kơ̆l tơring, Tổng Bí thư pơtho ăn dôm anih tơm, anih jang tơ̆ Trung ương păng tơring hơtŏk hrĕnh tơdrong jang Plei Keo, pơjing tơdrong 'lơ̆ng vă kon pơlei đei đak yoa, đei đak vă pơ 'nhŏ ăn tơdrong choh jang xa vă gơ̆h jang tŏk.

Yă Rmah H'Bé Nét ăn tơbăt: “Đei tơdrong tơtăm tôch dêh đơ̆ng Tổng Bí thư Nguyễn Phú Trọng, hơnhăk tơdrong jang man dơnâu Plei Keo truh, tơdrong man đei dơnâu âu tơpă mơ̆n kon pơlei tôch hơiă. Pơm ăn kơdơ chŭn đei đak vă kon pơlei jang ƀa. Tơplih ăn adrol sơ̆, 1 sơnăm jang 1 pơyan, dang ei đei hơbong đơ̆ng dơnâu Plei Keo pơchoh đak kơna kon pơlei gơ̆h jang 2 pơyan, pơm ‘lơ̆ng ăn tơdrong arih xa. Khei ‘năr âu ki apŭng kŭm akhan, 5 sơnăm âu ki đei tơdrong tơplih ‘lơ̆ng tơ̆ xăh Ayun, tơdrong arih xa kơ kon pơlei roi tŏk”.

Man đơ̆ng sơnăm 2018 truh ƀât blŭng sơnăm 2020 dơnâu đak đei man kĕh jăl 1 păng pơchoh đak vă tơruih ăn hlŏh 200 ha ‘long pơtăm tơ̆ xăh Ayun. Gơnơm đei dơnâu đak Plei Keo, kon pơlei Ayun hlôi tơplih đei đon tơchĕng, trong jang, băt rei pơtăm ƀa đak 2 pơyan kơna tơdrong arih xa roi đunh roi tơplih ‘lơ̆ng. Ưh lăp pơtăm ƀa 2 pơyan đĕch, đơ̆ng năr đei đak tơruih, kon pơlei Ayun hlôi hơtŏk đei tơdrong rong kon tơrong, rơmo, nŭng iĕr, hơdai hăm ‘nŏh chă pơtăm 1,2 kơ loăi ‘long pơgang lăp hăm tĕh, tŏ ‘mi kial tơ̆ tơring nhen ‘long đinh lăng âu to... vang tơgop pơm hơtŏk iŏk yoa ăn kon pơlei.