Tạ Thị Thuỳ Linh hăm Nguyễn Mai Thảo Anh ‘noh ƀar ‘nu đảng viên ‘nao đei pôk tơmơ̆t lơ̆m Đảng. Pơđĭ măr sư ‘noh hŏk tro hơgei 12 sơnăm hơnơ̆ng. 3 sơnăm hŏk jăl pêng tôch hơdrin vang iung jang lơ̆m rim tơdrong jang kơ Đoàn hơdruh tơdăm. Đe sư ‘nŏh lơ̆p phŏ vei lăng hŏk pơhrăm, jĭ kơ iĕng Ƀĭ thư đoàn kơ lăm. Thuỳ Linh gô mơ̆t hŏk lơ̆m Hnam trương Đăi hŏk Tang găn Pĭt ŭnh sa, găh Thảo Anh gô mơ̆t hŏk tơ̆ hnam trương Đăi hŏk Luơ̆t, Đại học Quốc gia Hà Nội. Tạ Thị Thuỳ Linh tơbăt jơhngơ̆m đon mư̆h đei mơ̆t lơ̆m khul Đảng:“Mư̆h đei mơ̆t lơ̆m khul Đảng ‘noh ba gô hơdrin hloh dơ̆ng lơ̆m rim tơdrong. Hơnơ̆ng hơdrin hŏk pơhrăm ‘lơ̆ng hloh dơ̆ng păng gô đei tơgop đei iŏk yua ăn tơpôl”.

Nguyễn Mai Thảo Anh ‘noh tơbăt:“Mĕ ƀă ĭnh păng đe mih ma duch nă lơ̆m ŭnh hnam ‘noh đảng viên ngăl kơna ba lui kơjăp lơ̆m Đảng. Mĕ ƀă jei chă pơtho ăn kơ ĭnh hlôh vao tŏ sĕt. Mĕ ƀă tôch tơgŭm djru ĭnh”.

Ƀok thây pơtho Trần Văn Công, Bí thư chi bộ 2, Đảng bộ hnam trương jăl pêng Buôn Đôn tơbăt: sơnăm hŏk 2020-2021, Hnam trương jăl pêng Buôn Đôn pôk tơmơ̆t đảng viên blŭng a ‘noh hŏk tro. ‘Nou jĭ mĭnh hơyak ‘nao kơ Đảng ƀô̆, kơ yuơ lơ̆m mă noh sơ̆ jei đei lơ ƀok thây kô ‘noh đảng viên oei drơ̆ng drơ̆t. Truh hloi đe mĕ ƀă hŏk tro jei akhan: Mơ̆t Đảng ‘noh tôch kơ hrôih hăm đe hăp ou.“Hăm rim bơngai ‘lơ̆ng, gơ̆h hơgei, vă pơtho pơhrăm păng tơmơ̆t jang Đảng ‘noh mĭnh tơdrong tôch gĭt kăl. Kơna ‘ngoăih ƀok thây kô vei lăng lăm, bơngai đảng viên chă pơtho pơhrăm ăn đe oh ‘noh nhôn hơnơ̆ng chă pơma dơnuh hăm ŭnh hnam vă ŭnh hnam tơgŭm ăn rim đe oh. Vă mư̆h đei mơ̆t lơ̆m Đảng ‘noh ưh kơ tơtăm yă kiơ păng tơbăt hơdăh jơhngơưm đon vă hơdrin hlŏh dơ̆ng lơ̆m jơhnơr hơrih kơ dih”.

Kô poơtho găh văn Trịnh Thị Dung - bơngai hlôi pơtho păng iŏk vei lăng lăm hŏk truh 18 sơnăm akhan: Tơdrong pơtho pơjoăt ăn hŏk tro đei jơhngơ̆m đon ‘mêm kơ eng kơ teh đak păng hlôh vao găh Đảng, găh trong jang kĕch mang, jơhngơ̆m đon hơdrin đơ̆ng kơdih ‘noh tơdrong jang kăl hloh, mă kăl hăm rim đe oh lăm 12.“ Jĭ mĭnh đảng viên hơlen tơƀôh tơbăt rim đoàn viên ăn chi ƀô̆, adoi nhen lăng hơlen ‘noh ba ƀôh hơdăh lơ lou, mă blŭng mưh tơgŭm djru ăn hŏk tro băt hlôh ƀôh hơdăh trong bơ̆ jang kơ Đảng adoi nhen jơhngơ̆m đon ‘mêm kơ eng Teh đak ‘noh ƀôh đe oh hơdrin hloh dơ̆ng; mă ƀar dơ̆ng ‘noh hlôh vao, hơbĕch hơbal hloh dơ̆ng lơ̆m lơ tơdrong nhen lơ̆m tơdrong hơrih sa adoi nhen lơ̆m hŏk pơhrăm”.

Ƀok thây Trần Vĩnh Trung, Kơ iĕng Kơdră chĕp pơgơ̆r Đảng, Kơ iĕng Kơdră chĕp pơgơ̆r Hnam trương jăl pêng Buôn Đôn sơkơ̆t hơdăh: tơdrong pơtho pơhrăm păng pôk tơmơ̆t hŏk tro lơ̆m Đảng ling lang đei kơdră Đảng hnam trương lăng kơjăp. Khul kơdră Đảng ưh kơdruh kiơ̆ tơmơ̆t đei lơ mă lei lăng kơjăp tơdrong kơjăp ‘lơ̆ng. “Khul kơdră Đảng ling lang dăr lăng hơlen rim đảng viên kơ hnam trương hlôi đei pôk tơmơ̆t, hlôi đei pơtrŭh vang mơ̆t lơ̆m khul Đảng rim hnam trương đăi hŏk, kao đăng lơ̆m teh đak. Hloh đơ̆ng hơlen, rim đe sư tôch ‘lơ̆ng hơ iă găh jơhngơ̆m đon gơ̆h hơgei, oei sa ‘lơ̆ng. Tôch tơnăp, pơm jŭk yŭk trong hơlou vang iung jang rim tơdrong pơgơ̆r kơ rim hnam trương đăi hŏk păng mĭnh lơ̆m dôm ‘nu bơngai tơnăp lơ̆m tơdrong jang kơ hơdruh tơdăm rim hnam trương đăi hŏk.”

Apŭng Buôn Đôn đei 2 hnam trương jăl pêng. Lơ̆m jăl jang ou hlôi pôk tơmơ̆t 18 ‘nu đảng viên ‘noh đe hŏk tro. Hơdrô̆ sơnăm hok 2023 - 2024 đei 6 ‘nu hŏk tro đei mơ̆t lơ̆m khul Đảng. Ƀok Ngô Cự Tâm, Kơdră Hơnih bơ̆ jang kơ Đảng uỷ Buôn Đôn tơbăt: Rim sơnăm Hnam trương pơtho pơhrăm Chinh trĭ kơ apŭng iung jang hơdoi hăm Đảng uỷ 2 hnam trương jăl pêng vă pơih rim lăm pơtho pơhrăm hlôh vao găh Đảng tơ̆ hnam trương. Pơjing khul đảng viên kơtă đơ̆ng hnam trương jăl pêng, vă mư̆h lĕch ‘măng khoă, đe oh sơkơ̆t hơdăh jơhngơ̆m đon păng tơdrong hơpơi ‘meh vă đơ̆ng kơ dih.“Lăp đơ̆ng rŏng hŏk tro lĕch ‘măng khoă brŏk tơ̆ pơlei tơring ‘noh Đảng ƀô̆ apŭng lăng ba kơjăp pơrô̆ athei rim đảng ƀô̆, chi ƀô̆ adoi nhen chi ƀô̆ tơring lăng ba, tơgŭm djru. Pơjing rơvơn ăn đe oh hơnơ̆ng hơdrin vă đei mơ̆t lơ̆m khul Đảng”.