‘Măng pơlong tôt ngĭp THPT xơnăm 2023 mă kăl noh adoi oei vei sơđơ̆ng nhen sơnăm 2022, mă lei tơchơ̆t pơlong đei minh ƀar anih ‘nao pơkăl bơngai pơlong athei hơlen băt mă hơdăh. Duch pơtho Lê Thị Minh Huế, chu nhiêm lăm 12A5, hnam trưng THPT Mạc Đĩnh Chi, apŭng Chư Păh ăn tơbăt:“Vă tơgŭm đe oh hlôh vao hơdăh hloh găh dôm tơdrong ‘nao lơ̆m tơchơ̆t pơlong tôt ngĭp sơnăm âu noh bơngai chu nhiêm athei jang lơ tơdrong, mă mônh noh lơ̆m jơ akŏm 15 pơnĭt blŭng jơ hŏk, jơ akŏm chu nhiêm rim giĕng, đang kơ noh kiơ̆ dôm tơdrong akŏm nhen grŭp Zalo vă tơroi tơbăt truh đe oh dôm tơdrong ‘nao lơ̆m ‘măng pơlong âu vă đe oh pơm kiơ̆ trŏ tơchơ̆t”

Oh Nguyễn Thị Anh Thơ – Lăm 12A7, hnam trưng THPT Mạc Đĩnh Chi, apŭng Chư Păh tơroi:“Kiơ̆ kơ inh chă hơlen păng đei băt, dôm tơdrong gơh ‘nhăk ba lơ̆m lăm pơlong noh ‘long chih, kre yŏng, ‘long grek, kơmăi tĭnh chĕp ti mă ưh gơh teh chư, ưh gơh ‘nhăk lơ̆m lăm pơlong dôm kơmăi hyup nơ̆r, kơmăi phĭn rŭp, mă kăl noh điê̆n thoăi di đŏng”

Atŭm hăm tơdrong tơroi vă hŏk tro băt hơdăh tơchơ̆t pơlong, dôm hnam trưng hŏk tơ̆ Gia Lai adoi akŏm hŏk vă pơlong tôt ngĭp. Dôm khul juăt pơtho chih akŏm tơdrong hŏk, tơklăh đe hŏk tro vă đei trong pơtho pơhrăm trŏ ƀlep hloh. Thâi Đỗ Văn Hiếu, pơtho tơ̆ trưng THPT Đinh Tiên Hoàng, apŭng  Krông Pa ăn tơbăt:“ Găh môn văn, nhôn asong hŏk tro jing grŭp, hŏk tro hơgei, hŏk brăm, hŏk ưh chăm, mă kăl noh hŏk tro hŏk ưh hơgei, đei tơdrong hơrih tơnap tap, noh nhôn tơgŭm lơ hloh, pơtho lơ hloh vă đe oh akŏm hơtŏk tơdrong kăl, vă kơjăp đon bơnôh ăn ‘măng pơlong truh âu kơnh”

Thâi Trịnh Văn Bình, Phŏ Kơdră hnam trưng THPT Đinh Tiên Hoàng tơroi, hnam trưng hlôi pơgơ̆r pơtho ăn hŏk tro dôm tơdrong hlôi đei hŏk, pơtho găh trong bơ̆ ƀai thi, vă đe oh sơđơ̆ng jơhngơ̆m ăh akŏm pơlong: “Ăh jê̆ đĭ khei 5 noh hnam trưng gô pơgơ̆r pơlong hơlen lăng găh tôt ngĭp THPT tơ̆ hnam trưng, vă đơ̆ng noh gô băt hơdăh, tơroi tơbăt tơchơ̆t pơlong ăn đe oh adrol kơ mơ̆t pơlong hơlen hơdrol tôt ngĭp THPT. Hơdrin sơnăm âu gô đei jơnei 98,5%. Tơdrong kơchăng pơtho hŏk đei hnam trưng asong kiơ̆ tơdrong hơpơi ‘meh đơ̆ng đe oh”

‘Măng pơlong THPT Kuôk ya sơnăm âu, jâ̆p dêh char Gia Lai đei hloh 15.200  bơngai chih măt pơlong; lơ̆m noh đei jê̆ 14.300 ‘nu pơlong hŏk phôh thŏng, 483 ‘nu pơlong hŏk kiơ̆ giáo dục thương xuyên, oei dôm to noh thĭ sinh tư̆ do. Lơ̆m kơsô̆ chih măt pơlong đei hloh 14.000 ‘nu chih măt xet twên đăi hŏk, kao đăng. Dêh char Gia Lai hlôi tơchơ̆t hăm 41 anih pơlong tơm.

Khei năr âu ki, Anih tơm Pơtho Pơhrăm hlôi tơchơ̆t tơbang Hla bar pơtho dôm Anih jang Pơtho Pơhrăm, Hnam trưng tơm – Anih tơm jang găh linh găh tơdrong pơgơ̆r pơlong tôt ngĭp trung hŏk phôh thŏng sơnăm 2023, lơ̆m noh tơbang khei năr pơlong hơdăh kơ ‘măng pơlong âu.

Kiơ̆ kơ noh, ‘măng pơlong tôt ngĭp THPT sơnăm 2023 đei pơgơ̆r lơ̆m dôm năr 27, 28, 29 păng 30/6/2023, lơ̆m noh, bơngai pơlong bơ̆ hla bơ-ar mơ̆t pơlong ăh kơsơ̆ năr 27/6, bơ̆ ƀai pơlong lơ̆m 2 năr 28 păng 29/6, păng 30/6 noh năr pơlong hơmŏ. Năr pơlong kiơ̆ rim môn đei pơkăp hơdăh nhen tơ̆ hơla: Năr 28/6, ăh pơgê pơlong môn Ngữ văn, ăh kơsơ̆ pơlong môn Toán; năr 29/6, pơgê pơlong 2 ƀai noh Khua hŏk tư̆ nhiên păng Khua hŏk săh hô̆i; ăh kơsơ̆ pơlong môn Nơ̆r teh đak đe.

Găh tơchơ̆t hơmet, pơgơ̆r ‘măng pơlong tôt ngĭp trung hŏk phôh thŏng  2023, Anih tơm Pơtho Pơhrăm pơkăl rim Anih jang Pơtho Pơhrăm pơgơ̆r rim hnam trưng phôh thŏng hơlen akŏm kơtơ̆ng ang găh hŏk tro oei hŏk lăm 12 kiơ̆ tơdrong chih akŏm kơ anih jang, đei hloh tơdrong kăl găh tơ-‘ngla hŏk tro păng tơdrong hŏk pơhrăm kơ rim hŏk tro.

Kiơ̆ kơtơ̆ng ang đơ̆ng Anih tơm Pơtho Pơhrăm, truh 8 jơ năr 18/7, rim Anih jang Pơtho Pơhrăm, rim anih chih măt pơlong gô tơbang tơdrong đei jơnei găh pơlong tôt ngĭp THPT 2023 păng rim hnam trưng phôh thŏng athei keh đang tơdrong tơchơ̆t tôt ngĭp adar hloh noh ăh năr 20/7. Tơchơ̆t truh năr 24/7, bơngai pơlong đei iŏk hla bơ-ar tơchơ̆t tôt ngĭp tơdăng, hŏk ƀă păng dôm kơluăi hla bơ-ar tơchơ̆t kăl nai.