Hơdai hăm dôm grŭp trong jang găh hơtŏk thu mong jên jang teh đak, sơng đei tơmơ̆t jên jang, hơtŏk tơiung trong nơnăm, hơtŏk dôm jên jang, tơmam, đei yua kơ rim tơring, dôm bơngai tang măt akhan Dak Lak kăl kơ bơngơ̆t hloh dơ̆ng truh tơdrong jang tơgŭm hơdrĕch kon kông, lui khop.

Tơ̆ ‘măng hop akŏm mă 6, Jơnŭm pơgơ̆r kon pơlei dêh char Dak Lak jăl X, dôm bơngai tang măt kŭm ‘măn lơ jơ vă pơma  dơnuh găh tơdrong tŭn pran tơdrong jang tơpôl vang tơgop lơ̆m pơtho pơhrăm, hơmet ăn kơ sô̆ biên chế mă lăp ăn rim anih jang, tơchĕng hơlen, hơtŏk loi dơ̆ng dôm trong jang vă hơnơ̆ng hơtŏk ‘lơ̆ng đei yua đơ̆ng tơdrong jang pơ jing tơring tơ rang ‘nao; hơnơ̆ng pơjing dôm tơmam OCOP ‘lơ̆ng, hơdrô̆ kơ tơring vă gơh tĕch mơdro hăm anih tĕch mơdro lơ̆m păng ‘ngoăih teh đak.