Tơ̆ dôm jơ tơƀâp lơ̆m dôm xăh Đắk Ru (apŭng Đắk R’lấp), xăh Đắk R’tíh (apŭng Tuy Đức), xăh Đắk Ha (apŭng Đắk Glong) păng xăh Đăk Drô (apŭng Krông Nô), dôm bơngai tang măt Quốc hội roi tơbăt ăn bơngai tăh hla Đắk Nông găh dôm tơdrong vă pơma nuh lơ̆m hop akŏm mă 6, Quốc hội jăl XV; chă mơ̆ng nơ̆r pơma apinh đơ̆ng bơngai tăh hla adrol kơ hop akŏm.

Bơngai tăh hla tơ̆ dôm tơring lơ̆m dêh char Đắk Nông pơma tơƀôh lơ tơdrong tam mă lăp, mă lơ ‘nŏh găh tơdrong man anih jang, pơm trong, chĕng hơmet tĕh, pơm hla ar tĕh. Bơngai tăh hla athei tĕh đak tơrĕk hlŏh dơ̆ng truh tơdrong pơm pơ ‘lơ̆ng trong nơnăm tơ̆ tơring tơrang, chă tơdrong jang ăn kon hơ ‘lơ̆p bơngai kon kông, vei lăng tơdrong thu jên lơ hlŏh tơdrong ƀât blŭng sơnăm hŏk… Lơ bơngai tang măt hơpơi ‘mĕh jăh tơlĕch jang Tơdrong jang pơm trong gre kơdâu hrĕnh Chơn Thành (Bình Phước) – Gia Nghĩa (Đắk Nông) tơgop pơjing đei jơhngâm pran vă jang atŏk tơiung mŭk drăm, tơpôl.